بحرین کے نیشنل گارڈ کے کمانڈر جنرل شیخ محمد بن عیسیٰ بن سلمان آل خلیفہ نے جی ایچ کیو میں آرمی چیف جنرل عاصم منیر سے ملاقات کی۔
پاک فوج کے شعبہ تعلقات عامہ (آئی ایس پی آر) کے مطابق ملاقات میں دوطرفہ فوجی تعاون کو مضبوط بنانے پر گفتگو ہوئی جبکہ باہمی دلچسپی، علاقائی سلامتی، انسداد دہشت گردی کی کوششوں اور تربیتی تبادلوں سے متعلق امور پر بھی بات چیت ہوئی۔ آرمی چیف جنرل عاصم منیر نے بحرین کے ساتھ فوجی تعلقات بڑھانے کا عزم دہرایا اور کہا کہ پاکستان بحرین کے ساتھ اپنے روایتی طور پر مضبوط دفاعی، سفارتی اور اقتصادی تعلقات کو بہت اہمیت دیتا ہے۔
ترجمان پاک فوج کے مطابق آرمی چیف نے مشترکہ سیکیورٹی چیلنجز سے نمٹنے اور علاقائی امن و استحکام کیلئے تعاون کی اہمیت پر بھی زور دیا۔ آئی ایس پی آر کے مطابق معزز مہمان نے دہشت گردی کیخلاف جنگ میں پاکستان کی کوششوں کو سراہا اور پاک فوج کی پیشہ ورانہ مہارت کا اعتراف کیا۔
