تھائی لینڈ نے رواں سال کے آخر تک چرس کے تفریحی استعمال پر پابندی لگانے کا اعلان کر دیا۔
خبر رساں ادارے رائٹرز کی ایک رپورٹ کے مطابق تھائی لینڈ کے وزیر صحت چولنان سریکاو نے کا کہنا ہے کہ حکومت اس سال کے آخر تک چرس کے تفریحی استعمال پر پابندی عائد کر دے گی، تاہم، طبی مقاصد کے لیے چرس کے استعمال کی اجازت جاری رہے گی۔
وزیر صحت چولنان سریکاو نے کہا کہ اس حوالے سے تیار کردہ بل اگلے ماہ منظوری کے لیے کابینہ کے پاس جائے گا اور اس سال کے اختتام سے پہلے پارلیمان سے منظور کروا لیا جائے گا۔
انہوں نے چرس کے استعمال کو کنٹرول کرنے کے لیے قانون لانے کی ضرورت پر روشنی ڈالی اور کہا کہ قانون کے بغیر اس کا غلط استعمال کیا جائے گا۔
انہوں نے کہا کہ چرس کے غلط استعمال کا تھائی بچوں پر منفی اثر پڑتا ہے اور طویل مدت میں یہ دیگر منشیات کا باعث بن سکتا ہے۔
وزیر صحت نے مزید بتایا کہ اس ملک میں قانونی طور پر رجسٹرڈ دکانوں کی تعداد 20 ہزار ہے جبکہ غیر قانونی دکانوں کو بند کر دیا جائے گا۔
