ویسٹ انڈیز کے کرکٹر فیبین ایلن کو جوہانسبرگ میں ڈاکوؤں نے گن پوائنٹ پر لوٹ لیا ۔
کرک ٹوڈے کی ایک رپورٹ کے مطابق 28 سالہ نوجوان ویسٹ انڈین کرکٹر فیبین ایلن کو ساؤتھ افریقا کے شہر جوہانسبرگ کے ایک ہوٹل کے باہر ڈاکوؤں نے گن پوائنٹ پر لوٹ لیا۔
جمیکا سے تعلق رکھنے والے ایلن ساؤتھ افریقا ٹی 20 لیگ میں پارل رائلز کی نمائندگی کر رہے ہیں اور انہیں ٹیم ہوٹل کے باہر ہولناک واقعہ کا سامنا کرنا پڑا۔
ڈاکوؤں نے آل راؤنڈر سے ان کا فون، ذاتی سامان اور ایک بیگ چھینا اور فرار ہوگئے۔
ایلن کے ساتھ پیش آنے والے واقعہ کے بعد لیگ پر اثر پڑ سکتا ہے کہ کھلاڑی جنوبی افریقا میں سکیورٹی بارے فکر مند ہیں۔
اس واقعے کی تصدیق پارل رائلز ٹیم، لیگ انتظامیہ اور کرکٹ ویسٹ انڈیز سے منسلک ذرائع نے کی ہے۔
ویسٹ انڈیز بورڈ سے منسلک ذرائع کا کہنا تھا کہ واقعہ کے دوران ایلن کو کوئی نقصان نہیں پہنچا۔
پارل رائلز کی انتظامیہ نے کوئی تفصیلات ظاہر نہیں کیں اور یہاں تک کہ لیگ کے سرکاری ترجمان نے بھی اس معاملے پر بات کرنے سے انکار کر دیا ہے، انہوں نے سب سے درخواست کی کہ وہ اس واقعے کی تفصیلات کے لیے پولیس سے بات کریں۔
یاد رہے کہ یہ دوسرا موقع ہے جب لیگ میں سکیورٹی مسلئہ سامنے آیا ہے ، لیگ دوسرا ایڈیشن پلے آف مرحلے میں ہے اور پارل رائلز 7 فروری کو ایلیمینیٹر میں مدمقابل ہوں گے جبکہ ایونٹ کا فائنل 10 فروری کو کھیلا جائے گا۔
