نیوزی لینڈ کے کپتان کین ولیمسن نے جنوبی افریقہ کے خلاف آئندہ ٹیسٹ سیریز کے لیے خود کو فٹ قرار دے دیا۔
کین ولیمسن دائیں ہیمسٹرنگ میں انجری کی وجہ سے گزشتہ ماہ پاکستان کے خلاف ٹی ٹوئنٹی سیریز کے آخری مرحلے سے باہر ہو گئے تھے تاہم، اب وہ جنوبی افریقہ کے خلاف آئندہ دو ٹیسٹ میچوں میں شرکت کے لیے تیار ہیں۔
کیویز بورڈ کی جانب سے جنوبی افریقہ کے خلاف ٹیسٹ سیریز کے لئے سکواڈ کا اعلان کر دیا گیا ہے جس کے بارے کپتان نے کہا ہے کہ یہ ایک مضبوط ٹیم ہوگی۔
ولیمسن کا کہنا تھا کہ جنوبی افریقہ کے خلاف یقینی طور پر ایک سخت مقابلہ ہونے والا ہے، ٹیم میں یہ سب بہت اچھے کھلاڑی ہیں اور ہم صرف اپنی توجہ اپنی کرکٹ پر واپس لانا چاہتے ہیں۔
ولیمسن نے مزید کہا کہ اہم ڈبلیو ٹی سی پوائنٹس حاصل کرنے کے لیے اپنے برانڈ کی کرکٹ کھیلنے پر توجہ مرکوز کریں گے۔
خیال رہے کہ نیوزی لینڈ نے کبھی بھی جنوبی افریقہ کے خلاف ٹیسٹ سیریز نہیں جیتی ہے۔
کیویز سکواڈ میں ٹم ساؤتھی، ٹام بلنڈل، ڈیون کونوے، میٹ ہنری، کائل جیمیسن، ٹام لیتھم، ڈیرل مچل، ول اوورکے ، گلین فلپس، راچن رویندرا، مچ سینٹنر، نیل ویگنر، کین ولیمسن اور ول ینگ شامل ہیں۔
