پاکستان بیورو آف اسٹیٹسٹکس کا کہنا ہے کہ رواں مالی سال کی پہلی ششماہی کے دوران ملک میں چائے کی درآمدات میں گزشتہ سال کے مقابلے میں 5.53 فیصد اضافہ ہوگیا۔
وفاقی ادارہ برائے شماریات (پی بی ایس) کے اعداد و شمار کے مطابق رواں مالی سال جولائی تا دسمبر (2023-24ء) کے دوران ملک میں چائے کی درآمدات گزشتہ سال کے اسی عرصے کے مقابلے میں 5.53 فیصد اضافے سے 33 کروڑ 64 لاکھ 23 ہزار ڈالر ریکارڈ کی گئی جو مالی سال 23-2023ء کے اسی عرصے میں 31 کروڑ 87 لاکھ 98 ہزار ڈالر تھی۔
رپورٹ میں بتایا گیا ہے کہ مقدار کے لحاظ سے درآمدات میں 9.12 فیصد اضافہ ہوا جو گزشتہ سال کی 128,068 میٹرک ٹن کے مقابلے میں رواں مالی سال 139,751 میٹرک ٹن رہی۔
دریں اثنا، سال بہ سال کی بنیاد پر دسمبر 2023ء کے دوران چائے کی درآمدات گزشتہ دسمبر کے 70.759 ملین ڈالر سے 16.80 فیصد کم ہوکر 58.869 ملین ڈالر ہوگئیں، جبکہ نومبر 2023ء میں 53.608 ملین ڈالر کی درآمدات کے مقابلے میں دسمبر 2023ء میں اجناس کی درآمدات میں 9.81 فیصد اضافہ دیکھا گیا۔
پی بی ایس کے اعداد و شمار میں بتایا گیا ہے کہ رواں مالی سال کی پہلی ششماہی کے دوران ملک میں فوڈ گروپ کی مجموعی درآمدات میں 19.48 فیصد کی کمی ریکارڈ کی گئی، جولائی تا دسمبر (2023-24ء) کے دوران خوراک کی درآمدات 3 ارب 95 کروڑ 71 لاکھ 88 ہزار ڈالر ریکارڈ کی گئیں جو کہ گزشتہ سال کے دوران 4 ارب 91 کروڑ 42 لاکھ 78 ہزار ڈالر تھیں۔
رپورٹ کے مطابق یہاں یہ بات قابل ذکر ہے کہ ملک کا مجموعی تجارتی خسارہ رواں مالی سال کی پہلی ششماہی کے دوران گزشتہ سال کی اسی مدت کے مقابلے میں 34.29 فیصد کم ہوا ہے، جولائی تا دسمبر (2023-24) تجارتی خسارہ 34.29 فیصد کی کمی کے بعد 11.148 ارب ڈالر ریکارڈ کیا گیا جو جولائی تا دسمبر (2022-23) میں 16.965 ارب ڈالر تھا۔
پی بی ایس کے تازہ ترین اعداد و شمار میں یہ بھی بتایا گیا ہے کہ زیر جائزہ مدت کے دوران برآمدات 5.17 فیصد اضافے کے ساتھ 14.981 ارب ڈالر ہوگئیں جو گزشتہ سال کی اسی مدت کے دوران 14.244 ارب ڈالر تھیں۔
رپورٹ کے مطابق دوسری جانب درآمدات میں 16.28 فیصد کمی آئی اور گزشتہ سال 31.209 ارب ڈالر کے مقابلے میں 26.129 ارب ڈالر ریکارڈ کی گئیں۔
