سڈنی میں اپنے کیریئر کا آخری ٹیسٹ میچ کھیلنے والے آسٹریلوی اوپنر ڈیوڈ وارنر کو پاکستان ٹیم کی جانب سے زبردست خراج تحسین پیش کیا گیا، قومی کپتان شان مسعود نے تحفہ بھی پیش کیا۔
پاکستان اور آسٹریلیا کے درمیان 3 ٹیسٹ میچوں کی سیریز کے آخری مقابلے میں کینگروز نے گرین کیپس کو 8 وکٹوں سے شکست دیکر سیریز میں وائٹ واش کردیا۔
سڈنی میں اپنے کیریئر کا آخری ٹیسٹ میچ کھیلنے والے ڈیوڈ وارنر نے آخری اننگز میں 57 رنز اسکور کئے اور ساجد خان کی گیند پر ایل بی ڈبلیو ہوگئے۔
ڈیوڈ وارنر جب آؤٹ ہوکر گراؤنڈ سے باہر جانے لگے تو پاکستانی کھلاڑیوں اور سڈنی اسٹیڈیم میں موجود تماشائیوں نے انہیں زبردست خراج تحسین پیش کیا۔
میچ کے اختتام پر منعقدہ تقریب کے دوران پاکستان ٹیم کے کپتان شان مسعود نے ڈیوڈ وارنر کو قومی ٹیم کی جانب سے مبارکباد پیش کی اور انہیں بابر اعظم کی شرٹ بطور تحفہ پیش کی جس پر تمام پاکستانی کھلاڑیوں کے دستخط بھی موجود تھے۔
