بالی ووڈ کنگ شاہ رخ خان کی رواں سال مسلسل تیسری فلم سپر ہٹ ہوگئی، ڈنکی نے صرف 2 دن میں 102 کروڑ کا بزنس کرلیا۔
شاہ رخ خان کی سال کے آغاز میں فلم پٹھان ریلیز ہوئی تھی جس کے بعد جوان اور اب فلم انڈسٹری کے کامیاب ترین ہدایت کار راج کمار ہیرانی کی فلم ڈنکی نے بھی باکس آفس پر دھوم مچادی ہے۔
بھارتی میڈیا رپورٹس کے مطابق جمعرات 21 دسمبر کو ریلیز ہونیوالی فلم ڈنکی نے پہلے دن 57 کروڑ 43 لاکھ کا بزنس کیا تھا جبکہ دوسرے دن اس کی آمدنی 45 کروڑ 10 لاکھ روپے رہی، یوں شاہ رخ خان کی فلم نے دنیا بھر سے صرف 2 دن میں 102 کروڑ 53 لاکھ روپے کا بزنس کرلیا۔
فلم ڈنکی میں شاہ رخ خان کے ساتھ تاپسی پنو، وکی کوشل، بومن ایرانی بھی اداکاری کا جادو جگا رہے ہیں۔
بھارتی میڈیا کے مطابق فلم ڈنکی شاہ رخ خان کی ایک سال میں تیسری سپر ہٹ فلم ہے، جو 100 کروڑ کلب کا حصہ بنی۔
میڈیا رپورٹس کے مطابق ڈنکی کا مقابلہ ساؤتھ انڈسٹری کے معروف اداکار پربھاس کی فلم سالار کے ساتھ چل رہا ہے، دونوں فلمیں ایک ہی روز بھارت سمیت دنیا بھر میں ریلیز ہوئی تھیں۔
کامیڈی، ڈرامہ اور ایکشن فلم ڈنکی غیر قانونی طور پر ملک چھوڑنے والوں کی کہانی ہے۔
