منشیات فروش ملزمہ انمول عرف پنکی کے خلاف بغدادی تھانے میں درج قتل کے مقدمے کا عبوری چالان تفتیشی افسر نے پراسیکیوشن کے پاس جمع کرا دیا۔
چالان کے مطابق 7 مئی کو مقدمے کا مدعی موٹرسائیکل کے کام کے سلسلے میں حاجی پیر محمد روڈ سے گزر رہا تھا کہ اس نے فٹ پاتھ پر ایک شخص کی لاش دیکھی، جس کے گرد لوگ جمع تھے۔
مدعی کے مطابق اس نے ریسکیو اہلکاروں کی مدد سے لاش کو ایمبولینس کے ذریعے بغدادی تھانے منتقل کیا، جہاں پولیس نے معائنے کے دوران مقتول کی جیب سے ایک ڈبی برآمد کی۔
چالان میں بتایا گیا ہے کہ گولڈن رنگ کی اس ڈبی پر ’’کوئین میڈیم پنکی، ڈان نام ہی کافی، انجوائے‘‘ درج تھا۔ مزید معلومات حاصل کرنے پر معلوم ہوا کہ انمول عرف پنکی منشیات فروخت کرتی ہے۔
تفتیشی افسر کے مطابق ملزمہ کے خلاف تاحال انویسٹی گیشن مکمل نہیں ہو سکی، تاہم قانونی مدت مکمل ہونے پر عبوری چالان جمع کرایا جا رہا ہے۔
دوسری جانب پراسیکیوشن کا کہنا ہے کہ عبوری چالان کی اسکروٹنی کی جا رہی ہے، جس کے دوران تفتیشی افسر سے نقائص اور خامیاں دور کرائی جائیں گی۔ اسکروٹنی مکمل ہونے کے بعد عبوری چالان جوڈیشل مجسٹریٹ کے پاس جمع کرایا جائے گا۔
واضح رہے کہ ملزمہ انمول عرف پنکی کے خلاف لائنز ایریا کے رہائشی شیروز کی مدعیت میں بغدادی تھانے میں مقدمہ درج ہے۔
