ایرانی مذاکراتی ٹیم کے سربراہ باقر قالیباف نے بیان جاری کرتے ہوئے کہاہے کہ ہمیں وعدوں اور گارنٹیوں پر کوئی اعتبار نہیں ہے، ہمارے لیے صرف عملی اقدامات ہی اصل معیار ہیں۔
تفصیلات کے مطابق باقر قالیباف کاکہناتھا کہ جب تک دوسرا فریق عملی قدم نہیں اٹھاتا، ہم کوئی اقدام نہیں کریں گے، کسی بھی معاہدے کا اصل فاتح وہ ہوتا ہے جو اگلے دن سے جنگ کیلئے بہتر تیاری کرے۔
ایرانی میڈیا کا کہناہے کہ امریکا ایران مفاہمتی یادداشت میں کچھ تبدیلیاں ہوئی ہیں، مفاہمتی یادداشت کا مسودہ ابھی فائنل نہیں ہوا۔
برطانوی اخبار کے مطابق صدر ٹرمپ نے ایران معاہدے کا مسودہ اسرائیل اور دیگر اتحادیوں سے شیئر کردیا،مسودے کی تفصیلات وہی ہیں جو کئی دنوں سے میڈیا پر زیر گردش ہیں، مسودے کے مطابق آبنائے ہرمز کھلے گی اور امریکی ناکہ بندی ختم ہوگی، ایران کے منجمد اثاثوں میں سے 12 ارب ڈالر ریلیز کیے جائیں گے، ایران کے ایٹمی پروگرام سے متعلق فیصلہ 60 دن کے اندر کیا جائے گا۔
ایرانی صدر
ایرانی صدر نے متبادل درآمدی راستوں کے انتظام کو تیز کرنے کی ہدایت کر تے ہوئے کہا کہ بنیادی اشیائے ضرورت، ادویات کی فراہمی یقینی بنانے کیلئے اقدامات کیے جائیں، جنوبی ساحلوں پر پابندی سے پیدا ہونے والی کمی شمالی بندرگاہوں سے پوری کی جائے، پاکستان، روس اور آذربائیجان کے ساتھ تجارتی راستوں سے فائدہ اٹھایا جائے۔
میئر نیویارک ظہران ممدانی
نیویارک کے میئر ظہران ممدانی نے ایران جنگ پر شدید تنقید کرتے ہوئے کہا کہ 3 ماہ پہلے ایک ایسی جنگ شروع کی گئی جس کیلئے کسی نے ووٹ نہیں دیا،اس جنگ کی قیمت آج عوام چکارہے ہیں،ہزاروں عام افراد جانوں سے گئے، 13 امریکی فوجی مارے گئے،امریکی عوام جنگ کے نتائج پیٹرول پمپس اور گروسری اسٹورز میں دیکھ رہے ہیں،میں شروع دن سے اس جنگ کے خلاف تھا، آج بھی ہوں، یہ جنگ ختم ہونی چاہیے۔
