وزیرِاعظم شہباز شریف اور ایران کے صدر مسعود پزشکیان کے درمیان ٹیلیفون پر رابطہ ہوا ہے، جس میں دونوں رہنماؤں نے عیدالاضحیٰ کے موقع پر ایک دوسرے کو مبارکباد دی اور خطے کی صورتحال پر گفتگو کی۔
ترجمان کے مطابق تقریباً 30 منٹ جاری رہنے والی اس گفتگو میں دونوں رہنماؤں نے اپنے اپنے ممالک کے عوام اور پوری مسلم اُمہ کے لیے نیک تمناؤں کا اظہار کیا۔
وزیرِاعظم نے موجودہ بحران کے دوران ایرانی شہریوں کے جانی نقصان پر افسوس کا اظہار کیا اور ایران کی قیادت اور عوام کے ساتھ یکجہتی کا اعادہ کیا۔ شہباز شریف کا کہنا تھا کہ فیلڈمارشل عاصم منیر نے خطے میں امن کے قیام کیلئےانتھک کوششیں کیں، وہ اُمید رکھتے ہیں کہ امن معاہدہ جلد طے پا جائے گا اور یہ ایرانی قوم کے وقار کے مطابق ہوگا۔
انھوں نے کہا کہ پاکستان ایک برادر اور ہمسایہ ملک کی حیثیت سے ہمیشہ ایران کے ساتھ کھڑا رہے گا اور امن کی بحالی کے بعد دونوں ممالک کے لیے روشن مستقبل موجود ہے۔
ایرانی صدر نے خطے میں امن کے قیام کے لیے پاکستان کے کردار کو سراہتے ہوئے وزیرِاعظم شہباز شریف اور فیلڈ مارشل سید عاصم منیر کا شکریہ ادا کیا۔
اس سے قبل وزیراعظم شہباز شریف نے کویت کے ولی عہد اور ملائیشیا کے وزیراعظم انورابراہیم سے الگ الگ رابطہ کیا۔ عید کی مبارکباد دی اور نیک خواہشات کا اظہار کیا۔
وزیراعظم شہبازشریف نے کویتی ولی عہد سے گفتگو میں برادرانہ تعلقات مزید مضبوط بنانے پر اتفاق کیا۔ شہبازشریف نے خطے میں امن کیلئے پاکستان کی کوششوں پر کویت کی حمایت کو سراہا۔
شہباز شریف سے گفتگو میں ملائشیا کے وزیراعظم نےامن کیلئے پاکستان کے مؤثر کردار کو سراہا۔ شہباز شریف نے پاکستانی امن اقدامات کی بھرپورحمایت پر ملائیشین ہم منصب سے اظہار تشکرکیا۔ دونوں رہنماؤں نے لبنان میں اسرائیلی کارروائیوں اورغزہ کی بگڑتی ہوئی صورتحال پر اظہار تشویش کیا۔
