صدرمملکت اوروزیراعظم شہبازشریف نےعیدالاضحیٰ کےموقع پرپوری قوم اورامت مسلمہ کودلی مبارکباد پیش کرتےہوئےعید کی خوشیوں میں مستحق، یتیم،بیمار،مزدور اور بے سہارا افراد کو خصوصی طور پر یاد رکھنے پر زور دیا۔
اپنے پیغام میں صدر مملکت نے کہا کہ عیدالاضحیٰ ہمیں قربانی، محبت، بھائی چارے اور ایثار کا درس دیتی ہے۔،اپنے دلوں میں دوسروں کے لیے جگہ پیدا کرنا ہی قربانی کا حقیقی تقاضا ہے۔ صدر مملکت نے قوم پر زور دیا کہ وہ عید کی خوشیوں میں غریب اور ضرورت مند طبقات کو شریک کریں۔
وزیراعظم شہبازشریف نے اپنے پیغام میں کہا کہ عیدالاضحیٰ ایمان، قربانی، ایثار اور انسانیت کی خدمت کے عظیم جذبے کی یاد دلاتی ہے،یہ دن حضرت ابراہیمؑ اور حضرت اسماعیلؑ کی عظیم قربانی کی یاد تازہ کرتا ہے اور ہمیں اللہ تعالیٰ کی رضا کیلئے ہر قربانی دینے کا درس دیتا ہے۔
قومی قیادت نے اپنےپیغامات میں فلسطین اور مقبوضہ جموں وکشمیر کےمظلوم مسلمانوں سے مکمل اظہارِیکجہتی بھی کیاکہا کہ پاکستانی قوم مشکل کی ہر گھڑی میں اپنے مسلمان بھائیوں کے ساتھ کھڑی ہے،امت مسلمہ کے اتحاد، ملکی سلامتی، ترقی اور خوشحالی کیلئے خصوصی دعائیں بھی کیں۔
وفاقی وزیرداخلہ محسن نقوی نے امت مسلمہ کوعید الاضحیٰ کی مبارکباد پیش کرتےہوئےکہا عید الاضحیٰ ایثار،قربانی،محبت اوراطاعت الہیٰ کا عظیم پیغام ہے،حضرت ابراہیمؑ اور حضرت اسماعیلؑ نے اللہ کی رضا کیلئےوفا اور بندگی کی اعلیٰ مثال قائم کی،اپنی خواہشات اوراناکو اللہ کی رضا کے لیے قربان کرنا ہی بڑی عید کا بڑا پیغام ہے۔
وزیرداخلہ نےکہاعید الاضحیٰ پرشہدائے وطن اورانکےعظیم خاندانوں کوسلام عقیدت پیش کرتا ہوں، وطن پرجانیں نچھاورکرنے والے بہادرسپوت قوم کے حقیقی ہیرو ہیں جنکی قربانیوں کوکسی ترازومیں نہیں تولا جاسکتا،آج بھی قوم کے محافظ وطن کی حفاظت کیلئے اپنے پیاروں سے دور عید منا رہے ہیں قوم سب کوسلام پیش کرتی ہے،دعا ہےکہ یہ عید پاکستان سمیت پوری امت مسلمہ کے لیے امن، ترقی، خوشحالی اور اتحاد کا پیغام ثابت ہو۔
