محکمہ داخلہ پنجاب نے عیدالاضحیٰ کے موقع پر کالعدم اور زیر نگرانی 89 تنظیموں کی فہرست جاری کر دی ہے۔
ترجمان کےمطابق شہریوں کو ہدایت کی گئی ہے کہ وہ ان تنظیموں یا ان کے ذیلی اداروں کو قربانی کی کھالیں ہرگزعطیہ نہ کریں، کیونکہ انسداد دہشت گردی ایکٹ 1997 کے تحت ایسی تنظیموں کی معاونت جرم تصور کی جاتی ہے۔
محکمہ داخلہ نےکہا ہےکہ کالعدم تنظیموں کی مدد کرنےوالے افراد قانون کی گرفت میں آئیں گے،پنجاب میں خیراتی اداروں کے لیے پنجاب چیریٹی کمیشن سے رجسٹریشن لازمی ہے، اور شہری صرف رجسٹرڈ اداروں کو ہی قربانی کی کھالیں دیں۔
اداروں کی تصدیق سرٹیفکیٹ پر موجود QR کوڈ کے ذریعے کی جا سکتی ہے تاکہ امداد صحیح اور مستحق افراد تک پہنچے۔
متعلقہ ڈپٹی کمشنرز مدارس اور خیراتی تنظیموں کو قربانی کی کھالیں اکٹھی کرنے کا اجازت نامہ دیتے ہیں،شہری یقینی بنائیں کہ پنجاب چیریٹی کمیشن یا ڈپٹی کمشنر کا سرٹیفیکیٹ رکھنے والے ادارے کو ہی قربانی کی کھال دیں،شہری یقینی بنائیں کہ انکی امداد دہشتگردوں کی بجائے صحیح حقدار تک پہنچ رہی ہے۔
کالعدم تنظیموں میں لشکر جھنگوی،سپاہ محمد پاکستان،جیش محمد، الرحمت ٹرسٹ بہاولپور، الفرقان ٹرسٹ کراچی،لشکر طیبہ،سپاہ صحابہ پاکستان،تحریک جعفریہ پاکستان،تحریک نفاذشریعت محمد، تحریک اسلامی، القاعدہ، ملت اسلامیہ پاکستان،خدام الاسلام،اسلامی تحریک پاکستان، جمعیت الانصار، جماعت الفرقان، حزب التحریر، خیر الناس انٹرنیشنل ٹرسٹ، بلوچستان لبریشن آرمی شامل ہیں۔
اس کے علاوہ اسلامک سٹوڈنٹس موومنٹ آف پاکستان، لشکر اسلامی، انصار السلام، حاجی نامدار گروپ، تحریک طالبان پاکستان، بلوچستان ریپبلیکن آرمی کالعدم تنظیموں میں شامل ہے۔
