برطانوی میڈیا کے مطابق برطانوی رائل ایئرفورس کے طیارے کا سگنل روسی سرحدی علاقے کے قریب جام کیا گیا۔
رپورٹ کے مطابق برطانوی وزیردفاع اسٹونیا سے برطانیہ واپس جارہے تھے کہ روسی سرحد کے قریب طیارے کا سگنل جام کیا گیا۔ جی پی ایس کی خرابی پر پائلٹ کو مختلف نیویگیشن نظام استعمال کرنا پڑا۔
واضح رہے کہ کچھ دن قبل برطانیہ نے الزام عائد کیا تھا کہ روسی جنگی طیاروں نے بحیرہ اسود کے اوپر بین الاقوامی فضائی حدود میں پرواز کرنے والے برطانوی فضائیہ کے ایک طیارے کے انتہائی قریب آ کر ’خطرناک‘ انداز میں مداخلت کی۔
برطانوی وزارت دفاع کے مطابق رائل ایئر فورس کا ریویٹ جوائنٹ طیارہ نیٹو کے مشرقی محاذ کے تحفظ کے سلسلے میں معمول کی نگرانی پرواز میں شریک تھا جب روسی لڑاکا طیاروں نے اس کا تعاقب کیا۔ روسی ایس یو-35 طیارہ برطانوی طیارے کے اتنا قریب آ گیا کہ ریویٹ جوائنٹ کے ہنگامی حفاظتی نظام متحرک ہو گئے، جس کے نتیجے میں آٹو پائلٹ سسٹم بھی بند ہو گیا۔
برطانیہ نے اس کارروائی کو غیر پیشہ ورانہ اور اشتعال انگیز قرار دیتے ہوئے کہا ہے کہ اس قسم کے اقدامات خطے میں کشیدگی کو مزید بڑھا سکتے ہیں۔
