سام سنگ لاس ویگاس میں ہونے والے سی ای ایس 2026 میں ایک بار پھر بھرپور انداز میں جلوہ گر ہونے جا رہا ہے، جہاں کمپنی ٹی وی، گیمنگ ڈسپلے، فولڈایبل فونز، آڈیو ڈیوائسز اور مصنوعی ذہانت (اے آئی) سے چلنے والے اسمارٹ ہوم آلات کی ایک وسیع رینج پیش کرے گی۔
لاس ویگاس میں ہونے والے سی ای ایس 2026 میں ایک بار پھر بھرپور انداز میں جلوہ گر ہونے جا رہا ہے، جہاں کمپنی ٹی وی، گیمنگ ڈسپلے، فولڈایبل فونز، آڈیو ڈیوائسز اور مصنوعی ذہانت (اے آئی) سے چلنے والے اسمارٹ ہوم آلات کی ایک وسیع رینج پیش کرے گی۔
ابتدائی بریفنگز اور لیکس سے ظاہر ہوتا ہے کہ اس بار کمپنی ایونٹ میں محض شرکت نہیں کر رہی بلکہ ایک مضبوط اور غالب موجودگی کے ساتھ سامنے آنے کی تیاری میں ہے۔ کمپنی نے دسمبر کے دوران متعدد پریس ریلیزز جاری کیں جن میں آنے والی مصنوعات کے ابتدائی اشارے دیے گئے تھے، جبکہ کئی بڑے اعلانات سی ای ایس کے دوران سامنے آئیں گے۔
مائیکرو آر جی بی ٹی وی: نئی ڈسپلے جنگ کا آغاز
اس بار توجہ کا سب سے بڑا مرکز مائیکرو آر جی بی ٹی وی لائن اپ ہے، جو 55 سے 115 انچ تک کے سائز میں پیش کی جائے گی۔ یہ ٹیکنالوجی روایتی بیک لائٹنگ کے بجائے انفرادی سرخ، سبز اور نیلی روشنی کے ذرائع استعمال کرتی ہے، جس کا مقصد او ایل ای ڈی کے قریب معیارِ تصویر کم قیمت میں فراہم کرنا ہے۔
ماہرین کے مطابق سی ای ایس 2026 اس بات کا اہم امتحان ہوگا کہ یہ نئی ٹیکنالوجی حقیقی استعمال میں کس حد تک کامیاب ثابت ہوتی ہے۔
گیمنگ مانیٹرز: رفتار اور تھری ڈی تجربے کی نئی حدیں
گیمنگ ڈسپلے کے شعبے میں بھی کمپنی نے اپنی اوڈیسی سیریز کو مزید آگے بڑھایا ہے۔ اوڈیسی تھری ڈی کو دنیا کا پہلا 6کے بغیر چشمے کے تھری ڈی گیمنگ مانیٹر قرار دیا جا رہا ہے، جبکہ اوڈیسی جی 6 کو 1040 ہرٹز ریفریش ریٹ کے ساتھ پیش کیا گیا ہے۔
اس کے ساتھ اوڈیسی جی 8 رینج میں 6کے، 5کے اور او ایل ای ڈی ویریئنٹس بھی شامل کیے جا رہے ہیں، جو اعلیٰ درجے کے گیمرز اور تخلیق کاروں کے لیے تیار کیے گئے ہیں۔
فولڈایبل فونز: مستقبل کی جھلک
اگرچہ اسمارٹ فونز سی ای ایس کا روایتی مرکز نہیں ہوتے، تاہم فولڈایبل ڈیوائسز اس بار بھی توجہ حاصل کر رہے ہیں۔ گلیکسی ٹرائی فولڈ، جو تین حصوں میں فولڈ ہونے والا پہلا فون ہے، نمائش میں رکھا جائے گا۔
اس کے علاوہ ڈسپلے ڈویژن کی جانب سے نئے فولڈایبل پینل کانسیپٹس بھی پیش کیے جانے کا امکان ہے، جو مستقبل کی ڈیوائسز کی سمت واضح کریں گے۔
آڈیو ڈیوائسز: اسمارٹ اسپیکرز اور ساؤنڈ بارز
کمپنی نے اپنی آڈیو لائن اپ میں بھی توسیع کرتے ہوئے کیو سیریز ساؤنڈ بارز کے ساتھ دو نئے وائی فائی اسپیکرز متعارف کرائے ہیں، جن کے نام میوزک اسٹوڈیو 5 اور میوزک اسٹوڈیو 7 رکھے گئے ہیں۔
میوزک اسٹوڈیو 7 میں 3.1.1 چینل سسٹم اور مصنوعی ذہانت کے فیچرز شامل ہیں، جبکہ چھوٹا ماڈل میوزک اسٹوڈیو 5 کمپیکٹ ڈیزائن کے ساتھ پیش کیا گیا ہے۔
مصنوعی ذہانت: نئی حکمت عملی کا مرکز
اس بار سی ای ایس میں پوری حکمت عملی کا محور مصنوعی ذہانت ہے۔ کمپنی اپنے ڈیوائس ایکسپیرینس ڈویژن کے تحت ایک مربوط اے آئی وژن پیش کر رہی ہے، جس کا مقصد تمام ڈیوائسز کو ایک ہی ذہین ایکو سسٹم میں جوڑنا ہے۔
لاس ویگاس کے دی وِن میں کمپنی کا خصوصی نمائشی مقام اس وژن کا مرکز ہوگا، جہاں اس کی اے آئی ایجادات کو نمایاں انداز میں پیش کیا جائے گا۔
اسمارٹ ہوم آلات: اے آئی سے چلنے والا نیا نظام
اس بار اے آئی سے لیس گھریلو آلات کی نئی لائن بھی متعارف کرائی جائے گی، جن میں بسپوک اے آئی لانڈری کومبو، ایئر ڈریسر، ونڈ فری پرو ایئر کنڈیشنر اور جیٹ بوٹ اس ٹیم کلیننگ روبوٹ شامل ہیں۔
گوگل کے اشتراک سے منتخب آلات میں جیمینی اے آئی فیچرز بھی شامل کیے جا رہے ہیں، جن میں بسپوک اے آئی فیملی ہب ریفریجریٹر اور اے آئی وائن سیلر شامل ہیں۔ اس پیش رفت سے اسمارٹ ہوم ایکو سسٹم مزید مربوط اور خودکار ہو جائے گا۔
مجموعی طور پر سی ای ایس 2026 میں پیش کی جانے والی یہ ٹیکنالوجیز اس بات کی طرف اشارہ کرتی ہیں کہ کمپنی اب صرف ڈیوائس بنانے والی کمپنی نہیں رہی، بلکہ ایک مکمل مصنوعی ذہانت پر مبنی ڈیجیٹل ایکو سسٹم تشکیل دینے کی طرف بڑھ رہی ہے۔
