واٹس ایپ نے صارفین کی پرائیویسی مزید مضبوط بنانے کے لیے ایک نیا 'یوزر نیم' فیچر متعارف کرانے کا اعلان کیا ہے، جس کے ذریعے اب صارفین اپنا موبائل نمبر شیئر کیے بغیر ایک دوسرے سے رابطہ کر سکیں گے۔
اس نئے فیچر کے تحت ہر صارف ایک منفرد یوزر نیم منتخب کر سکے گا، جسے دوسروں کے ساتھ شیئر کرکے چیٹ کی جا سکے گی۔ اس طرح سامنے والے شخص کو صارف کا ذاتی فون نمبر نظر نہیں آئے گا، جس سے پرائیویسی میں نمایاں اضافہ ہوگا۔
واٹس ایپ کے مطابق اگر کسی صارف کے پاس صرف آپ کا یوزر نیم ہوگا تو وہ آپ کو واٹس ایپ پر پیغام بھیج سکے گا، تاہم آپ کے موبائل نمبر کے بغیر وہ براہِ راست فون کال یا روایتی ایس ایم ایس نہیں کر سکے گا۔ یہ سہولت خاص طور پر ان افراد کے لیے مفید ہوگی جو کاروباری یا عارضی رابطوں میں اپنا ذاتی نمبر ظاہر نہیں کرنا چاہتے۔
کمپنی نے بتایا ہے کہ یوزر نیم زیادہ سے زیادہ 35 حروف پر مشتمل ہوگا، جبکہ صارفین ضرورت کے مطابق اسے کسی بھی وقت تبدیل یا حذف بھی کر سکیں گے۔ تاہم واٹس ایپ اکاؤنٹ بنانے اور اس کی تصدیق کے لیے موبائل نمبر کی شرط بدستور برقرار رہے گی۔
جعل سازی اور شناخت کی نقل سے بچاؤ کے لیے معروف شخصیات، سرکاری عہدیداروں اور دیگر نمایاں نام عام صارفین کے لیے دستیاب نہیں ہوں گے۔ اس کے علاوہ واٹس ایپ یوزر نیم کے غلط استعمال کی روک تھام کے لیے حفاظتی نظام بھی متعارف کرا رہا ہے، جس میں مشتبہ سرگرمیوں کی نشاندہی اور شکایت درج کرانے کی سہولت شامل ہوگی۔
واٹس ایپ کے مطابق یہ فیچر رواں ہفتے سے مرحلہ وار صارفین کے لیے جاری کیا جا رہا ہے اور آئندہ چند ماہ میں دنیا بھر کے تقریباً تین ارب صارفین تک پہنچ جائے گا۔ اس فیچر سے فائدہ اٹھانے کے لیے صارفین کو واٹس ایپ کا تازہ ترین ورژن استعمال کرنا ہوگا۔
واٹس ایپ کا نیا 'یوزر نیم' فیچر متعارف، نمبر شیئر کیے بغیر رابطہ ممکن ہوسکے گا
واٹس ایپ اکاؤنٹ بنانے اور اس کی تصدیق کے لیے موبائل نمبر کی شرط بدستور برقرار رہے گی
