وفاقی وزیر مواصلات عبدالعلیم خان نے کہا ہے پاک چین سفارتی تعلقات کے 75 سال مکمل ہونے پر دلی فخر ہے ، یہ رشتہ ناقابل شکست اور" آل ویدر اسٹریٹجک پارٹنرشپ " ہے ، ہم چین کو اپنا" آئرن برادر" مانتے ہیں ۔
پاکستان اور چین کے سفارتی تعلقات کے پچہتر برس مکمل ہونے پر اپنے پیغام میں وفاقی وزیر مواصلات عبدالعلیم خان نے اپنے بیان میں کہا پاک چین شراکت داری گہرے اعتماد، باہمی احترام اور مشترکہ ترقی کی امین ہے ۔ عبدالعلیم خان نے کہا ہے سی پیک، صدر شی جن پنگ کے وژنری بیلٹ اینڈ روڈ کا فلیگ شپ منصوبہ ہے، پاکستان میں اب تک سی پیک کی تقریبا ڈیڑھ ہزار کلومیٹر پر پھیلی شاہراہیں تعمیر ہوئیں ۔ سی پیک کی یہ شاہراہیں ہماری باہمی مخلصانہ معاونت کا ٹھوس اور واضح ثبوت ہیں ۔ وفاقی وزیر مواصلات عبدالعلیم خان نے کہا ہمارا کثیرالجہتی اتحاد خطے کے پائیدار استحکام اور خوشحالی کا سنگ بنیاد ہے ۔ دوستی کی" ڈائمنڈ جوبلی" پر ہم اپنے مشترکہ مستقبل کے عزم کا اعادہ کرتے ہیں ۔
عبدالعلیم خان نے کہا سفارتی محاذوں پر چین کی غیر متزلزل حمایت پر ہم ان کے تہہ دل سے شکر گزار ہیں ، دونوں ممالک کی قیادت میں پاک چین شراکت داری نئی بلندیوں کو چھوئے گی ۔ عبدالعلیم خان نے کہا عالمی برادری کے لیے پاک چین لازوال دوستی بین الاقوامی تعاون کا ماڈل ہے ۔
