پاکستان اور چین کی دوستی کی شہد سے میٹھی اور ہمالیہ سے بلند دوستی کو 75 سال مکمل ہوگئے، دونوں ممالک کے مثالی تعلقات کی 75 ویں سالگرہ کو وفاقی دارالحکومت میں شایان شان طریقے سے منایا گیا، مختلف تقاریب کا بھی انعقاد کیا گیا۔
تفصیلات کے مطابق پاک پاکستان اور چین کے سفارتی تعلقات کے 75 برس مکمل ہونے پر وزارت داخلہ میں ہونے والی مرکزی تقریب میں وزیرمملکت داخلہ اور سیکرٹری داخلہ نے پودا لگایا۔وفاقی پولیس کے چاق و چوبند دستے نے گارڈ آف آنر پیش کیا۔پاک چین دوستی کو خطے کے امن، ترقی اور اعتماد کی روشن مثال قرار دیا گیا۔
طلال چوہدری نے کہا کہ یہ اتنا اہم دن ہے کہ اس حوالے سے اب وزیراعظم پاکستان چائنہ کا دورہ کر رہے ہیں کہ پاکستان اور چائنہ کے تعلقات کا 75 سال مکمل ہونے پر اور مختلف معاہدوں سی پیک جیسے معاہدوں کو آگے بڑھایا جائے گا۔
وزارت پارلیمانی امور میں بھی پاک چین تعلقات کے پچھتر برس مکمل ہونے پر تقریب منعقد ہوئی۔ وفاقی وزیر پارلیمانی امور طارق فضل چوہدری نے پاک چین دوستی کو بے مثال قرار دیتے ہوئے کہا کہ چین نے ہمیشہ ہر مشکل وقت میں پاکستان کا ساتھ دیا۔تقریب کے شرکاء نے دونوں ممالک کے درمیان تجارتی، معاشی اور تزویراتی تعاون کو مزید فروغ دینے کے عزم کا اعادہ بھی کیا۔
پاک چین دوستی کے75سال مکمل ہونے پر ننکانہ صاحب ضلعی ہیڈکوارٹرمیں بھی پروقار تقریب کا انعقاد کیا گیا، ڈپٹی کمشنر تسلیم اختر راؤ نے چینی وفد کے ہمراہ پرچم کشائی کی، تقریب میں ایڈیشنل ڈپٹی کمشنر،اے سی،سی ای او ایجوکیشن دیگر ضلعی افسران سمیت سکھ برادری نے بھی شرکت کی۔
پاکستان اور چین کے قومی پرچم لہرائے گئے، قومی ترانے بھی بجائے گئے، دونوں ممالک کے درمیان تعاون اور ترقی کے عزم کا اعادہ کیا گیا، ڈی سی ننکانہ تسلیم اختر نے کہا کہ پاک چین دوستی ہمالیہ سے بلند اور سمندروں سے گہری ہے۔
