وفاقی وزیر مواصلات عبدالعلیم خان نے پاک چین سفارتی تعلقات کے 75 سال مکمل ہونا قابل فخر قراردیتے ہوئے کہا ہے کہ عالمی برادری کے لیے پاک چین لازوال دوستی بین الاقوامی تعاون کا ماڈل ہے۔
وفاقی وزیر مواصلات عبدالعلیم خان نے تہنیتی پیغام میں کہا کہ چین سفارتی تعلقات کے 75 سال مکمل ہونے پر دلی فخر ہے۔ یہ رشتہ ناقابل شکست اور" آل ویدر اسٹریٹجک پارٹنرشپ " ہے، ہم چین کو اپنا" آئرن برادر" مانتے ہیں۔ پاک چین شراکت داری گہرے اعتماد، باہمی احترام اور مشترکہ ترقی کی امین ہے۔
عبدالعلیم خان نے کہا ہے سی پیک، صدر شی جن پنگ کے وژنری بیلٹ اینڈ روڈ کا فلیگ شپ منصوبہ ہے، پاکستان میں اب تک سی پیک کی تقریبا ڈیڑھ ہزار کلومیٹر پر پھیلی شاہراہیں تعمیر ہوئیں۔ سی پیک کی یہ شاہراہیں ہماری باہمی مخلصانہ معاونت کا ٹھوس اور واضح ثبوت ہیں۔
عبدالعلیم خان نے کہا ہمارا کثیرالجہتی اتحاد خطے کے پائیدار استحکام اور خوشحالی کا سنگ بنیاد ہے۔ سفارتی محاذوں پر چین کی غیر متزلزل حمایت پر ہم ان کے تہہ دل سے شکر گزار ہیں۔
وفاقی وزیر مواصلات نے کہا عالمی برادری کے لیے پاک چین لازوال دوستی بین الاقوامی تعاون کا ماڈل ہے ۔ اس دوستی کی" ڈائمنڈ جوبلی" پر ہم اپنے مشترکہ مستقبل کے عزم کا اعادہ کرتے ہیں۔ دونوں ممالک کی قیادت میں پاک چین شراکت داری نئی بلندیوں کو چھوئے گی۔
