پیٹرولیم مصنوعات کی قیمتوں میں اضافے کے بعدپاکستان منی مزدا ایسوسی ایشن نے کرایوں میں دس فیصد اضافے کا اعلان کردیا۔
پیٹرولیم مصنوعات کی قیمتوں میں اضافے کےبعد اس کے اثرات ٹرانسپورٹ سیکٹرپربھی ظاہر ہونا شروع ہوگئےہیں،پبلک ٹرانسپورٹرز نے از خود کرایوں میں پانچ فیصد اضافہ کردیا، جبکہ گڈز ٹرانسپورٹ اور منی مزدا کے کرایوں میں دس فیصد تک اضافہ کر دیا گیا،کرایوں میں اضافے کا اطلاق آج سے کر دیا گیا۔
صدرپاکستان منی مزدا ایسوسی ایشن کا کرایوں میں10فیصد اضافےکا اعلان کردیا ہے،صدر حاجی شیر علی کا کہنا ہےکہ پچھلی دفعہ بھی ڈیزل کی قیمتوں میں اضافےپرکرائےنہیں بڑھائے، پھر سے ڈیزل کی قیمتوں میں اضافے سے کرایوں میں اضافے پر مجبور ہیں۔
محکمہ ٹرانسپورٹ پنجاب اور ریجنل ٹرانسپورٹ اتھارٹی نے تاحال کرائے بڑھانے کا اعلان نہ کیا،سیکرٹری آر ٹی اے لاہور نےکرایوں میں اضافے کے لیے ٹرانسپورٹرز کے ساتھ مشاورتی اجلاس طلب کر لیا،مشاورتی اجلاس میں سرکاری سطح پر فیصلہ ہو گا کہ کرائے کتنے فیصد بڑھیں گے۔
واضح رہےکہ حکومت نے پیٹرول کی فی لیٹر کی قیمت میں 14 روپے 92 پیسے فی لیٹر کا اضافہ کر دیاہے جس کےبعد پیٹرول کی نئی قیمت 414 روپے 78 پیسے فی لیٹر مقرر کر دی گئی ہے جبکہ ہائی سپیڈ ڈیزل کی قیمت میں 15 روپے فی لیٹر اضافہ کیا گیاہے جس کے بعد نئی قیمت 414 روپے 58 پیسے مقرر کی گئی ہے۔
