اسلام آباد ہائی کورٹ نے 190 ملین پاؤنڈ کیس میں بانی پی ٹی آئی اوربشریٰ بی بی کی آج سماعت ملتوی کرنے کی استدعا منظور کرلی۔ چیف جسٹس سرفرازڈوگر نے ریمارکس دیئے بانی اور بشریٰ بی بی کے وکلاء کو آخری موقع دے رہے ہیں۔
اسلام آباد ہائی کورٹ کے چیف جسٹس سرفراز ڈوگر اور جسٹس محمد آصف نے سماعت کی۔ نیب اسپیشل پراسیکیوٹر جاوید ارشد اور رافع مقصود عدالت کے سامنے پیش ہوئے جبکہ بانی پی ٹی آئی اور بشریٰ بی بی کے وکیل بیرسٹرسلمان صفدرپیش نہیں ہوئے۔
عدالت کی ہدایت پر کیس ملتوی کرنے کی متفرق درخواست پڑھی گئی، جس کی مخالف کرتے ہوئے نیب پراسیکیوٹر نے کہا بار بار ملاقاتیں کرنے کی بات کی جاتی ہے۔ ملاقات میں کیا بات ہوئی یہ بھی میڈیا میں آنا چاہیئے، جس پر درخواستگزاروں کے وکیل شعیب شاہین نے کہا کیس یہاں چلانا ہے یا میڈیا میں چلانا ہے،جس پر چیف جسٹس نے ریمارکس دیئے ۔۔۔ چلیں اس بہانےآج شعیب شاہین کی آوازبھی سنی ہے۔
عدالت نے اپیلوں پر دلائل کے لیے حتمی مہلت دیتے ہوئے سماعت 20 مئی تک ملتوی کر دی۔ چیف جسٹس سرفرازڈوگر نے ریمارکس دیئے ہم کیس کی حساسیت مدنظررکھتے ہوئے التواء کی درخواست منظورکر رہے ہیں۔ امید ہے آئندہ سماعت پر کیس کی کارروائی آگے بڑھے گی۔
