لاہور میں موسم کی تپش بڑھتے ہی بجلی کی طلب میں ریکارڈ اضافہ ہوگیا ، پارہ چالیس ڈگری تک پہنچا تو شہر کے مختلف علاقوں میں غیراعلانیہ لوڈ شیڈنگ کا مسئلہ دوبارہ سر اٹھانے لگا ۔
لاہور میں آج درجہ حرارت چالیس ڈگری سینٹی گریڈ تک ریکارڈ کیا گیا جس نے شہریوں کو قبل از وقت شدید گرمی کا احساس دلادیا ہے ۔ محکمہ موسمیات کےمطابق لاہور سمیت پنجاب بھر کے میدانی علاقوں میں گرمی شدت اختیار کررہی ہے ۔ دن بھر درجہ حرارت میں اضافے سے شہری سایہ تلاش کرتے رہے ۔ دوسری جانب، گرمی کی شدت بڑھتے ہی لیسکو کے سسٹم پر دباؤ بڑھ گیا ہے ۔ شہر کے گنجان آباد علاقوں گڑھی شاہو، مغل پورہ اور اقبال ٹاؤن کے رہائشیوں کا موقف ہے کہ ایک مرتبہ پھر دو سے چار گھنٹے کی غیراعلانیہ لوڈ شیڈنگ کی جارہی ہے ۔
