ٹک ٹاکر کاشف ضمیر کا ایک اور فراڈ منظرعام پر آگیا۔ نوسرباز نے سی ٹی ڈی کراچی کے اہلکار سے یورپ بھجوانے کے نام پر 20 لاکھ روپے ہڑپ کرلئے۔ ملزم کاشف کیخلاف لاہور کے تھانہ گلبرگ میں مقدمہ درج کرلیا گیا۔ گرفتاری کیلئے چھاپے مارے جارہے ہیں۔
نوسربازی کی دنیا میں عالمی شہرت یافتہ ٹک ٹاکر کاشف ضمیر نے سی ٹی ڈی کراچی کے اہلکار کو لاکھوں کا چونا لگادیا۔ متاثرہ اہلکاردوست محمد نے الزام عائد کیا کہ کاشف ضمیر نے ایک سال قبل اٹلی کا ویزہ دلوانے کے نام پر 20 لاکھ روپے وصول کئے اور پھرغائب ہوگیا۔
دوست محمد نے شکایت کی تو لاہور کے تھانہ گلبرگ میں کاشف ضمیر کیخلاف فراڈ کا مقدمہ درج کرلیا گیا۔ پولیس کا کہنا ہے کہ ملزم کی گرفتاری کیلئےچھاپے جاری ہیں۔
کاشف ضمیر کیخلاف فراڈ اور دھوکہ دہی کے متعدد مقدمات درج ہیں۔ جیل بھی جاچکا ہے۔ وہ پہلی بار اس وقت خبروں کی زینت بنا جب ترکیہ کے ڈرامہ ارتغرل غازی کے مرکزی کردار اینگن التان کیساتھ نوسربازی کی واردات کی۔
