راولپنڈی کے نواحی علاقے ڈھوک مقدم میں انتہائی افسوسناک واقعہ پیش آیا ہے جہاں بھائی نے بہن کو قتل کر دیا، پولیس نے قانونی ضابطہ مکمل کرکے لاش ورثا کے حوالے کر دی جبکہ ملزم کی گرفتاری کی کوششیں جاری ہیں۔
واقعے کا مقدمہ تھانہ مندرہ میں مقتولہ فرحت شاہین کے والد ملازم حسین کی مدعیت میں درج کیا گیا ہے۔ ایف آئی آر کے مطابق چار ماہ قبل بیٹی فرحت شاہین کی شادی محمد عثمان کے ساتھ ہوئی۔ نو مارچ کو بیٹی کسی وجہ سے گھر سے چلی گئی جس پر اغوا کا مقدمہ بھی درج کرایا۔ گیارہ مارچ کو بیٹی بازیاب ہوئی۔ صبح بیٹا ارسلان گھر آیا اور بیٹی فرحت شاہین سے گھر سے چلے جانے پر تلخ کلامی کی۔ ارسلان نے پستول سے فرحت شاہین کے چہرے اور ٹانگ پر گولیاں ماریں۔ فرحت شاہین موقع پر ہی جاں بحق ہو گئی جبکہ ملزم موقع سے فرار ہو گیا۔ مقتولہ کے والد کے مطابق خاوند کے ساتھ ناچاقی کی وجہ سے بیٹی اُن کے ساتھ ہی رہائش پذیر تھی۔ قتل کا واقعہ اہلیہ ریحانہ بی بی، بیٹے فیضان احمد ، بیٹیوں زیبا شاہین اور مسرت شاہین نے بھی دیکھا۔ پولیس نے فرار ہونے والی ملزم کی گرفتاری کیلئے کوششیں شروع کر دی ہیں۔
