ایف بی آر ایک بار پھر ٹیکس وصولی کا ہدف پورا کرنے میں ناکام رہا۔ موحودہ مالی سال کے پہلے 10 ماہ میں شارٹ فال بڑھ کر 683 ارب روپے تک پہنچ گیا۔ صرف اپریل میں ٹیکس وصولی میں 73 ارب روپے کی کمی ریکارڈ کی گئی ۔ ریونیو میں مجموعی گروتھ 13 فیصد سے کم ہو کر 10 فیصد رہ گئی۔
مالی سال کے پہلے دس ماہ میں نظرثانی شدہ ٹیکس ہدف 10 ہزار 946 ارب روپے تھا ۔ ذرائع کے مطابق ایف بی آر 10 ہزار 263 ارب روپے ٹیکس جمع کر سکا۔ اپریل میں ایف بی آر نے 356 ارب روپے جمع کئے جبکہ اس ماہ ٹیکس وصولی کا ہدف ایک ہزار 29 ارب روپے تھا ۔
اپریل میں انکم ٹیکس 446 ارب، سیلز ٹیکس 320 ارب روپے جمع ہوا ۔ فیڈرل ایکسائز ڈیوٹی کی مد میں 65 ارب روپے ، کسٹمز ڈیوٹی کی مد میں 125 ارب روپے جمع ہوئے ۔ ایف بی آر کا اصل سالانہ ٹیکس ہدف 14 ہزار 131 ارب تھا۔ نظرثانی شدہ ہدف کم کر کے 13 ہزار 989 ارب روپے مقرر کیا گیا تھا۔
