آئی سی سی ٹی20 ورلڈ کپ 2026 کے فائنل میں آج بھارت اور نیوزی لینڈ مد مقابل ہوں گے۔ بھارت کے نریندر مودی اسٹڈیم، احمد آباد میں ہونے والے اس میگا میچ کے فاتح کو نہ صرف ٹرافی حاصل ہوگی بلکہ کھلاڑیوں اور ٹیم کو بھاری انعامی رقم بھی ملے گی۔
اس سال آئی سی سی نے ٹی20 ورلڈ کپ کے لیے مجموعی طور پر 13.5 ملین ڈالرز کا انعامی پول مقرر کیا ہے، جو 2024 کے ٹورنامنٹ کے مقابلے میں 20 فیصد زیادہ ہے۔ فاتح ٹیم کو 3 ملین ڈالرز ملیں گے جبکہ رنرز اپ کو 1.6 ملین ڈالر دیے جائیں گے۔
سیمی فائنل میں ہارنے والی ٹیموں کو ہر ایک کو 790,000 ڈالرز ملیں گے، جبکہ سپر 8 مرحلے تک پہنچنے والی ٹیمیں ہر ایک 380,000 ڈالرز وصول کریں گی۔ گروپ مرحلے میں شامل ٹیمیں بھی کم از کم 250,000 ڈالرز کے انعام کی حقدار ہوں گی۔
یاد رہے کہ 2024 کے ٹی20 ورلڈ کپ میں بھارت نے فاتح بن کر 2.45 ملین ڈالرز اور رنرز اپ جنوبی افریقہ نے 1.28 ملین ڈالرز حاصل کیے تھے۔ اس کے علاوہ، بورڈ آف کنٹرول فار کرکٹ ان انڈیا نے بھارتی ٹیم کے تمام کھلاڑیوں، کوچز، اسٹاف اور ریزرو کھلاڑیوں کے لیے اضافی انعام بھی اعلان کیا تھا۔
