لاہور ہائیکورٹ نے اسموگ کے تدارک کے لیے تجارتی سرگرمیاں رات دس بجے بند کرانے کا حکم دے دیا۔
لاہور ہائیکورٹ کے جسٹس شاہد کریم نے اسموگ کے تدارک کے حوالے سے دائر کی جانے والی شہری ہارون فاروق سمیت دیگر کی درخواستوں پر تحریری حکم جاری کردیا ہے جس میں کہا گیا ہے کہ تجارتی سرگرمیاں رات دس بجے بند کرائی جائیں۔
عدالت کی جانب سے سی سی پی او لاہور کو مارکیٹیں بند کرانے کے حکم پرعملدرآمد کرنے جبکہ وزیر اعلیٰ کے سیکرٹری کو اقدامات کرنے کی ہدایات بھی دی گئی ہے۔
تحریری حکم کے مطابق ایڈمسٹریشن لاہور اور حکومت دو دن ورک فرام ہوم کا نوٹیفکیشن جاری کرے۔
عدالت کی جانب سے ڈی سیل ہونے والے انڈسٹری یونٹس کو دوبارہ سیل کرنے اور ڈی سیل کرنے والے افسران کے خلاف کارروائی کا حکم بھی دیا گیا۔
عدالت نے آئندہ سماعت پرفیکٹریوں کو سیل کرنے کی رپورٹ بھی طلب کرلی ۔
تحریری حکم میں کہا گیا کہ گرین بیلٹ پر پارکنگ کرنے والوں کیخلاف کاروائیاں جاری رکھی جائیں اور گرین بیلٹ کو نقصان پہنچانے والے فارم ہاؤس کو گرایا جائے۔
