وفاقی وزیر مواصلات سے آل پاکستان گڈز ٹرانسپورٹرز اونرز ایسوسی ایشن کے وفد نے ملاقات کی ۔ عبدالعلیم خان نے ایکسل لوڈ کی پابندی کو ناگزیر قرار دیا۔ گڈز ٹرانسپورٹرز وفد کو تمام اسٹیک ہولڈرز کو قائل کرنے کا مشورہ دیدیا۔
وزیر مواصلات کا کہنا تھا ایکسل لوڈ کی پابندی ٹرانسپورٹرز اور قومی انفرااسٹرکچر کے لئے نہایت ضروری ہے ۔ٹرانسپورٹ کی پائیداری اور سڑکوں کے تحفظ کیلئے ایکسل لوڈ قوانین کی پابندی لازم ہے۔ ایکسل لوڈ کی حدود برقرار رکھنا مجموعی کاروباری ماحول کے لئے بے حد فائدہ مند ہے۔ ٹرانسپورٹرز کے لئے طویل مدتی استحکام اور بہتری صرف خود ضابطگی میں ہی ہے۔
صدر گڈز ٹرانسپورٹرز محمد اویس نےکہا ایسوسی ایشن عدالتی فیصلوں اور طے شدہ قوانین کی مکمل پاسداری پر یقین رکھتی ہے ۔ قوانین کی خلاف ورزی سے ایندھن کا ضیاع اور حادثات میں اضافہ ہوتا ہے ۔ ناقص ریٹس اور مالی نقصان سے بچنے کے لیے ایکسل لوڈ پر عملدرآمد ناگزیر ہے ۔ ملاقات میں ایم ون اور جی ٹی روڈ پر ایکسل لوڈ کے نفاذ کے حوالے سے تفصیلی بات چیت ہوئی۔
