ایرانی ریڈ کریسنٹ سوسائٹی نے کہاہے کہ امریکہ اور اسرائیلی حملوں میں 201 افراد جاں بحق جبکہ 747 سے زائد زخمی ہیں ۔
تفصیلات کے مطابق ایرانی ریڈ کریسنٹ سوسائٹی کے ترجمان نے مہر نیوز ایجنسی سے گفتگو میں بتایا کہ امریکہ اور اسرائیل کی جانب سے ایران کے 24 صوبوں پر حملے کیئے گئے جن میں 201 افراد جاں بحق ہوئے ہیں ۔
انہوں نے بتایا کہ ریڈ کریسنٹ کی 220 ٹیمیں حملوں کا نشانہ بنے والے مقامات پر ریسکیو آپریشنز انجام دے رہی ہیں ۔
اسرائیل کا اپنی تاریخ کا بڑا فضائی آپریشن کرنے کا دعویٰ
اسرائیل ڈیفنس فورسز نے دعویٰ کیا ہے کہ اس نے اپنی تاریخ کی فضائی کارروائی انجام دی ہے ، جس کے دوران تقریباً 200 لڑاکا طیاروں نے ایران کے مغربی اور وسطی علاقوں میں میزائل اور فضائی دفاعی نظام کو نشانہ بنایا۔
اسرائیلی فوج کے بیان کے مطابق اس کارروائی میں سیکڑوں ہتھیار استعمال کیے گئے اور بیک وقت تقریباً 500 اہداف کو نشانہ بنایا گیا، جن میں فضائی دفاعی نظام اور میزائل لانچرز شامل تھے۔
اسرائیلی فوج کا کہنا ہے کہ ان حملوں کے نتیجے میں اسرائیلی فضائیہ کو ایرانی فضائی حدود میں برتری حاصل ہوئی اور ایرانی نظام کی جارحانہ صلاحیتوں، خصوصاً مغربی ایران میں موجود میزائل لانچ سائٹس کو شدید نقصان پہنچا۔
بیان میں مزید کہا گیا کہ ایک حملہ مغربی ایران کے شہر Tabriz میں زمین سے زمین تک مار کرنے والے میزائل لانچنگ مقام پر بھی کیا گیا۔
ایران کی جوابی کارروائی
ایران کی جانب سے اسرائیل کیخلاف جوابی حملہ جاری ہے جسے ’ فتح خیبر‘‘ کا نام دیا گیا جس دوران ایران نے سینکڑوں میزائلوں سے اسرائیل کے متعدد شہروں کو نشانہ بنایا جس کی ویڈیوز بھی سوشل میڈیا پر وائرل ہو رہی ہیں ۔
ایرانی پاسداران انقلاب نے بیان جاری کرتے ہوئے کہا کہ جو جدید ہتھیار ہم نے چھپائے تھے اب وہ نکالیں گے،ہمارے پاس برسوں تک لڑنے کیلئے جدید ہتھیار ہیں،ہم نے ابھی تک طاقتور اور جدید ہتھیار استعمال نہیں کئے۔
ایرانی پاسداران انقلاب نے دوسری جانب آبنائے ہرمز بند کرنے کا اعلان کرتے ہوئے کہا کہ کسی جہاز کو آبنائے ہرمز سے گزرنے کی اجازت نہیں ہو گی۔
آبنائے ہرمز سے روزانہ تقریباً 90 اور سال بھر میں 33 ہزار بحری جہاز گزرتے ہیں، آبنائے ہرمز مشرقِ وسطیٰ کو ایشیا، یورپ، شمالی امریکا اور دیگر دنیا سے جوڑتی ہے۔
ایران کے خلیجی ممالک میں امریکہ فوجی اڈوں پر حملے
ایران نے خلیجی خطے میں اہداف کو نشانہ بنانے کی تصدیق کر دی، ایران کی جانب سے قطر میں العدید ایئر بیس، کویت میں السالم ایئر بیس، متحدہ عرب امارات میں الظفرہ ایئر بیس، بحرین میں امریکہ کا پانچواں فوجی اڈے کو نشانہ بنایا گیاہے ۔
متحدہ عرب امارات
متحدہ عرب امارات کی وزارت دفاع نے بیان جاری کرتے ہوئے کہا ہے کہ ایران کی جانب سے دبئی پر داغے میزائلوں کو روک دیا، میزائلوں میں اب تک چار شہری زخمی ہوچکے۔
خبر ایجنسی کا کہناہے کہ دبئی میڈیا آفس کے مطابق دبئی کے علاقے Palm Jumeirah میں ایک عمارت پر ڈرون حملے کی اطلاعات ہیں کے نتیجے میں چار افراد زخمی ہو گئے۔
بیان میں کہا گیا ہے کہ واقعے کے فوراً بعد ہنگامی امدادی ٹیمیں موقع پر پہنچ گئیں اور علاقے کو محفوظ بنا لیا گیا۔ دبئی سول ڈیفنس نے تصدیق کی ہے کہ واقعے کے نتیجے میں لگنے والی آگ پر قابو پا لیا گیا ہے۔
میڈیا آفس کے مطابق زخمی ہونے والے چار افراد کو طبی امداد کے لیے قریبی طبی مراکز منتقل کر دیا گیا ہے۔
صورتحال کے پیش نظرمتحدہ عرب امارات نے اپنی فضائی حدود عارضی طور پر بند کرنے کا اعلان کیا ہے، اماراتی حکام کےمطابق یہ اقدام احتیاطی تدبیر کے طور پر اٹھایا گیا ہے۔
آج صبح ہونے والے میزائل حملے میں متحدہ عرب امارات کی جانب سے میزائل کو انٹرسپٹ کیا گیا جس کا ملبہ گرنے سے ایک پاکستانی شہری کی موت ہوئی۔
کویت
کویت میں ایرانی حملوں میں 12 زخمی افراد زخمی ہوئے ہیں جنہیں طبی امداد کیلئے ہسپتال منتقل کر دیا گیا ہے ۔
کویت کی جنرل اتھارٹی برائے شہری ہوابازی کے مطابق کویت انٹرنیشنل ایئرپورٹ کو ڈرون حملے کا نشانہ بنایا گیا جس کے نتیجے میں متعدد ملازمین کو معمولی زخم آئے اور مسافر عمارت کو محدود نوعیت کا نقصان پہنچا۔
قطر
خبر ایجنسی کے مطابق دوحا میں پھر 3 مقامات پر دھماکوں کی آوازیں سنی گئی ہیں، تاہم فی الحال جانی نقصانات کی اطلاعات موصول نہیں ہوئیں۔
قطری وزارت خارجہ نے شہریوں سے گھروں میں رہنے کی اپیل کی ہے ، بیان میں کہا کہ عوام کھڑکیوں اور کھلے مقامات سے دور رہیں،صرف انتہائی ضرورت کی صورت میں شہری گھروں سے باہر نکلیں۔
ایران کی جانب سے داغی گئی پہلی لہر میں قطری دارالحکومت دوحہ میں زور دار دھماکے سنے گئے، یہ دھماکے قطر کی جانب سے تمام میزائل مار گرانے کے بیان کے بعد ہوئے، جبکہ قطر نے شہریوں کو فوجی اڈوں سے دور رہنے کی ہدایت کی گئی ہے۔
اتھارٹی کے سرکاری ترجمان عبداللہ الراجحی نے بتایا کہ حملے کے فوری بعد متعلقہ حکام نے منظور شدہ ہنگامی طریقہ کار فوری طور پر نافذ کردیا، حالات کو قابو میں کرلیا گیا ۔
اردن
اردن فوج کا کہنا ہےکہ اردن نے 2 بیلسٹک میزائل مار گرائے،ابھی واضح نہیں یہ میزائل کس نے فائر کے تھے۔
بحرین
بحرین میں ایرانی حملوں میں متعدد رہائشی عمارتوں کو نقصان پہنچا ہے تاہم کسی جانی نقصان کی اطلاعات موصول نہیں ہوئی ہیں۔
ایرانی حکام کا کہنا ہےکہ خطے میں موجود تمام امریکی اور اسرائیلی تنصیبات ان کے ہدف پر ہیں اور امریکا کے تمام اڈے اور مفادات انکی پہنچ میں ہیں۔
عراق کی فضاؤں میں لڑاکا طیارے اور میزائل دیکھے گئے،عراقی پیرا ملٹری فورس حشد الشعبی کےہیڈکوارٹر پرحملہ،حملےمیں ایک شخص جاں بحق اورتین زخمی ہوئے،میزائل اورطیارےاسرائیلی سمت سے عراق میں داخل ہورہے ہیں۔
