وزیراعظم شہباز شریف سے عالمی بینک گروپ کے صدر اجے بنگا نے ملاقات کی۔ وزیراعظم کا کہنا تھا کہ پاکستان کی اقتصادی ترقی اور اصلاحات میں عالمی بینک کی معاونت کو قدر کی نگاہ سے دیھتے ہیں۔
وزیراعظم نے عالمی بینک گروپ کے صدر اجے بنگا کے پہلے سرکاری دورہ پاکستان پر ان کا خیرمقدم کیا۔ وزیرعظم نے عالمی بینک گروپ کے ساتھ پاکستان کی طویل المدتی شراکت داری کو سراہا۔
شہباز شریف کا کہنا تھا کہ 10 سالہ کنٹری پارٹنرشپ فریم ورک کے تحت تعاون قابل تحسین ہے۔ پاکستان میں اصلاحات اور ترقیاتی ترجیحات کے فروغ کے لیے عالمی بینک کا کردار اہم ہے۔ حکومت پائیدار اقتصادی استحکام کے لیے جامع اصلاحاتی پروگرام پر عمل پیرا ہے۔
انفراسٹرکچر، زراعت، ڈیجیٹل ترقی اور توانائی میں عالمی بینک کی معاونت کو سراہتے ہیں۔ روزگار کے مواقع اور نجی سرمایہ کاری کے فروغ کے لیے اصلاحات ناگزیر ہیں۔
ملاقات کے دوران کنٹری پارٹنرشپ فریم ورک پر تیز رفتار عملدرآمد اور مؤثر نگرانی پر اتفاق کیا گیا۔ صدر عالمی بینک نے حکومت پاکستان کی جاری اصلاحاتی کوششوں کو سراہا اور پاکستان کے اصلاحاتی ایجنڈے کی بھرپور حمایت کا اعلان کیا۔
ان کا کہنا تھا کہ پاکستان کے ساتھ تعاون مزید گہرا کیا جائے گا۔ صدر عالمی بینک نے نجی وسائل کے مؤثر استعمال اور ترقیاتی شراکت داری بڑھانے کی ضرورت پر زور دیا۔
