وزیراعلیٰ خیبر پختونخوا سہیل آفریدی سے عالمی بینک کے صدر اجے بنگا نے ملاقات کی۔جس میں صحت، تعلیم و ہنر، معدنیات، توانائی اور کلائمیٹ رزیلینس کے شعبوں میں تعاون بڑھانے پر تبادلہ خیال کیا گیا۔
وزیر اعلیٰ نے اسلام آباد میں ورلڈ بنک کے صدر سے ملاقات میں خیبر پختونخوا کے مشیر خزانہ مزمل اسلم ، چیف سیکرٹری شہاب علی شاہ و دیگر متعلقہ حکام بھی ملاقات میں موجود تھے۔وزیر اعلیٰ سہیل خان نے کہا کہ خیبر پختونخوا حکومت عالمی بینک کے تعاون کو قدر کی نگاہ سے دیکھتی ہے۔
سہیل آفریدی نے کہا کہ صحت اور تعلیم صوبائی حکومت کی اولین ترجیحات ہیں، ان شعبوں میں خطیر سرمایہ کاری کی جا رہی ہے، پرائمری ہیلتھ کیئر کے نظام کو مضبوط بنایا جارہا ہے۔ سہیل آفریدی نے کہا کہ خیبر پختونخوا میں احساس ماں پروگرام کا آغاز کیا جا رہا ہے۔ جس میں حمل سے بچے کی پیدائش تک ماں اور بچے کی مکمل دیکھ بھال حکومت کی ذمہ داری ہوگی،جبکہ بچی کی پیدائش کی صورت میں تین ماہ اضافی معاونت فراہم کی جائے گی۔
انہوں نے کہا کہ قدرتی آفات سے خیبر پختونخوا کو شدید نقصان پہنچا، کلائمیٹ رزیلینس میں سرمایہ کاری بڑھا رہے ہیں۔اسی طرح پارٹی بانی چیئرمین کے وژن کے مطابق معدنیات کے شعبے میں مقامی آبادی کے مفادات کو پہلی ترجیح دی جا رہی ہے۔
وزیراعلیٰ خیبر پختونخوا نے کہا کہ صوبے کو غذائی لحاظ سے خود کفیل بنانے کے لیے جامع حکمت عملی کے تحت اقدامات کیے جا رہے ہیں اورجنوبی اضلاع میں بنجر زمینوں کو کابل کاشت بنانے کے لیے متعدد منصوبوں پر کام جاری ہے۔
