نیب میں اسپیشل انویسٹی گیشن ڈویژن قائم کردیا گیا۔ ہائی پروفائل کیسز کی تحقیقات کیلئے نیا نظام متعارف کرایا گیا ہے۔
قومی احتساب بیورو میں اسپیشل انویسٹی گیشن ڈویژن کے قیام کی منظوری دے دی گئی ہے۔ چیئرمین نیب کی منظوری کے بعد نئے ڈویژن کو باضابطہ طور پر فعال کیا جا رہا ہے، جس کا مقصد ہائی پروفائل کیسز کی مؤثر تحقیقات کو یقینی بنانا ہے۔
دستاویز کے مطابق اسپیشل انویسٹی گیشن ڈویژن کا الگ ڈائریکٹر جنرل ہوگا اور گریڈ 21 کے محمد طاہر کو اس ڈویژن کا ڈی جی تعینات کیا گیا ہے، جو براہ راست چیئرمین نیب کو جواب دہ ہوں گے۔
اس نئے ڈویژن میں جوائنٹ انویسٹی گیشن ٹیم اور لینڈ ڈائریکٹوریٹ کو بھی ضم کر دیا گیا ہے تاکہ تحقیقات کا عمل مزید مربوط اور تیز بنایا جا سکے۔اسپیشل انویسٹی گیشن ڈویژن کیلئے دو پراسیکیوٹرز بھی تعینات کیے گئے ہیں جن میں عرفان بھولا اور شاہد نواز جدون شامل ہیں، جبکہ گریڈ 17،18 اور 19 کے 10 افسران کی خدمات بھی اسی ڈویژن کے سپرد کردی گئی ہیں۔
