ملکی زرعی شعبے کے لیے سال 2026 کا شاندار آغاز ہو گیا،جہاں پاکستان نے چاول کی برآمدات میں بڑی کامیابی حاصل کرتے ہوئے دنیا کا تیسرا بڑا چاول برآمد کرنے والا ملک بننے کا اعزاز حاصل کر لیا ہے۔
بین الاقوامی جریدےگلف نیوز نےپاکستانی چاول کی عالمی سطح پرپذیرائی کی تصدیق کر دی ہےدسمبر 2025 کے دوران پاکستانی چاولوں کی برآمدات میں ماہانہ بنیادوں پر 14 فیصد اضافہ ریکارڈ کیا گیا، جس نے عالمی منڈی میں پاکستان کی مضبوط موجودگی کو نمایاں کیا۔ خاص طور پر باسمتی چاول کی برآمد میں 50 فیصد سے زائد غیر معمولی اضافہ ہوا، جو اس کامیابی میں کلیدی کردار ادا کرتا ہے۔
اعدادوشمار کےمطابق گزشتہ ماہ پاکستان نے 4 لاکھ 89 ہزار ٹن چاول برآمدکیے،جبکہ اسی عرصے میں ویتنام کی چاول برآمدات 3 لاکھ 87 ہزار ٹن رہیں۔ اس شاندار کارکردگی کےنتیجےمیں پاکستان نے عالمی درجہ بندی میں تیسری پوزیشن حاصل کر لی،پاکستانی چاول سب سے زیادہ متحدہ عرب امارات، چین، تنزانیہ، کینیا اور آئیوری کوسٹ کو برآمد کیا گیا۔
ماہرین کے مطابق پاکستانی باسمتی چاول کا اعلیٰ معیار اور مسابقتی قیمتیں بین الاقوامی منڈیوں میں اعتماد کو مزید مضبوط بنا رہی ہیں۔ زرعی ماہرین کا کہنا ہے کہ چاول کی برآمدات میں مسلسل اضافہ ملکی معیشت کے لیے خوش آئند ہے اور اس سے زرعی شعبے کو مزید فروغ ملے گا۔
