راولپنڈی میں چیف ٹریفک آفیسر کی جانب سے کی گئی محکمانہ کارروائی کے خلاف ٹریفک وارڈن احسن شاہ نے افسران کو قانونی نوٹس ارسال کر دیا ہے۔ قانونی نوٹس راولپنڈی ٹریفک پولیس کے مختلف افسران کو بھیجا گیا ہے۔
قانونی نوٹس کے مطابق ٹریفک وارڈن احسن شاہ نے الزام عائد کیا ہے کہ ریونیو اکٹھا کرنے کے لیے روزانہ کی بنیاد پر 15 چالان کا ٹارگٹ دیا جاتا ہے، جس کے باعث انہیں غیر قانونی دباؤ اور ذہنی اذیت کا سامنا کرنا پڑا۔ نوٹس میں کہا گیا ہے کہ اعلیٰ افسران روزانہ کی بنیاد پر غیر قانونی چالان کرنے پر مجبور کرتے ہیں۔
قانونی نوٹس میں مؤقف اختیار کیا گیا ہے کہ بدانتظامی، غفلت یا ڈیوٹی کی خلاف ورزی ثابت کیے بغیر ہی جرمانہ عائد کیا گیا، جو انصاف کے بنیادی اصولوں کے منافی ہے۔ نوٹس کے مطابق یہ کارروائی اختیارات کے ناجائز استعمال اور آئینِ پاکستان کے آرٹیکل 4 اور 14 کی صریح خلاف ورزی ہے۔
ٹریفک وارڈن احسن شاہ نے افسران کو 7 دن کے اندر قانونی نوٹس کا جواب جمع کرانے کی ہدایت کی ہے۔ ذرائع کے مطابق یہ قانونی نوٹس چیف ٹریفک آفیسر راولپنڈی، انسپکٹر ناصر جدون، انچارج چالان برانچ سمیت دیگر متعلقہ افسران کو بھیجا گیا ہے۔
دوسری جانب ترجمان ٹریفک پولیس نے الزامات کی تردید کرتے ہوئے کہا ہے کہ کسی بھی ٹریفک وارڈن کو نہ تو چالان کا کوئی ٹارگٹ دیا گیا ہے اور نہ ہی غیر ضروری چالان کرنے کی ہدایت کی جاتی ہے۔
