پاکستان اور سعودی عرب نے شعبہ معدنیات میں دوطرفہ تعاون کو مزید مضبوط بنانے پر اتفاق کرلیا۔
وفاقی وزیر پیٹرولیم علی پرویز ملک کی ریاض میں سعودی وزیرِ صنعت و معدنی وسائل بندر ابراہیم الخریف سے ملاقات ہوئی۔ معدنیات اور کان کنی کے شعبے میں دوطرفہ تعاون کو مزید مضبوط بنانے پر اتفاق کیا گیا۔ وزیر پٹرولیم علی پرویز ملک ریاض میں فیوچر منرلز فورم دو ہزار چھبیس میں پاکستانی وفد کی قیادت کر رہے ہیں ۔
ملاقات میں سعودی وزیر معدنیات کا کہنا تھا معدنی شعبے میں پاکستان اور سعودی عرب میں تعاون کے وسیع مواقع موجود ہیں، سعودی عرب اپنی علمی و تکنیکی مہارت کے ذریعے پاکستان کے معدنی شعبے کی ترقی میں تعاون فراہم کرے گا ۔ فیوچر منرلز فورم میں پاکستان کی شرکت پر مشکور ہیں۔
وزیر پیٹرولیم علی پرویز ملک نے کہا ٹیتھیان بیلٹ میں بے پناہ معدنی صلاحیت ہے جس کا ریکوڈک ایک چھوٹا حصہ ہے ۔ جیولوجیکل سروے آف پاکستان ، سعودی ہم منصب ادارے کےساتھ تعاون کر رہا ہے ۔ کھاد کی پیداوار اور طبی آلات کی تیاری کے شعبے بھی مشترکہ منصوبوں کے اہم مواقع ہیں۔
سعودی سفیر نواف بن سعید المالکی نے وزیرِاعظم شہبازشریف اور وزیر پیٹرولیم علی پرویزملک کی قیادت کو سراہا اور امید ظاہر کی کہ پاکستان اور سعودی عرب کےدیرینہ تعلقات مزید مضبوط ہوں گے۔
