وزیر اطلاعات عطاتارڑ کا کہنا ہے کہ پی ٹی آئی کالعدم ٹی ٹی پی کاسیاسی ونگ ہے۔ ان پر حملہ نہیں ہوگا۔ پی ٹی آئی نے استثنیٰ لیا ہوا ہے، قوم جو خمیازہ بھگت رہی ہے اس کے پیچھے تحریک انتشارہے۔ کالعدم ٹی ٹی پی کے بارے میں پی ٹی آئی والوں کی زبانیں لڑکھڑا جاتی ہیں۔
اسلام آباد میں پریس کانفرنس کے دوران عطاتارڑ نے کہا کہ خیبرپختونخوا میں ایسی حکمران مسلط ہیں جن کے ذہن بہت چھوٹے ہیں، خیبر پختونخوا میں بدقسمتی سے چھوٹے دل والی حکومت مسلط ہے، وزیراعلٰی کے پی نے لاہور جاتے ہی خواتین کی تضحیک کی۔ خیبر پختونخوا کی حکومت کا کردار شرمناک ہے، عورتوں پر طعنے کستے ہیں۔
وزیر اطلاعات نے کہا کہ پی ٹی آئی کالعدم تحریک طالبان کے خلاف بات کیوں نہیں کرتی؟، تم میں طاقت ہے تو حوصلے سے بات کرو، آج قوم دہشتگردی کا جو خمیازہ بھگت رہی ہے اس کے پیچھے تحریک انتشار کا سیاسی ونگ ہے، ٹی ٹی پی پاکستان کی دشمن ہے، آخری دم تک اس کا تعاقب کریں گے۔
عطاتارڑ نے کہا کہ پی ٹی آئی نے دہشت گردوں کو لاکر خیبر پختونخوا میں بسایا، ان کا لیڈر دہشت گردوں کو شہید کہتا تھا،اُن کا اپنا ایجنڈا ہے، پاک فوج کے کسی جوان کیلئےکبھی انہوں نے ایک لفظ تک نہیں لکھا، کالعدم ٹی ٹی پی کا تعاقب کر کے اس کا خاتمہ کریں گے۔
ان کا کہنا تھا کہ پنجاب کی ترقی سب کے سامنے ہے،سوائےکے پی ہر جگہ ترقی ہو رہی ہے، سندھ اور بلوچستان میں ترقیاتی منصوبے جاری ہیں، خیبر پختونخوا 12 سال سے برسراقتدار حکومت کی گورننس زبوں حالی کا شکار ہے۔
انہوں نے کہا کہ وزیراعظم کے بیرونی دوروں پر تنقید کرنے والے لوگ نادان ہیں، کوئی بلا رہا ہے تو وزیراعظم جا رہے ہیں، دعا کریں ہر وزیراعظم کو اتنی ہی عزت ملے جتنی شہباز شریف کو ملتی ہے، وزیراعظم اور فیلڈ مارشل کی عزت ہر پاکستانی کی عزت ہے۔
