دسمبر 2025 پاکستان کے 65 برسوں کے گرم ترین دسمبروں میں شامل ہوگیا۔
محکمہ موسمیات نے دسمبر 2025 کی ماہانہ موسمیاتی رپورٹ جاری کردی۔رپورٹ میں ملک بھر میں دسمبر کے دوران دن اور رات کے درجہ حرارت معمول سے زیادہ رہے۔
محکمہ موسمیات نے دسمبر 2025 کو گزشتہ 65 سال میں ساتواں سب سے زیادہ گرم دسمبر قرار دیدیا۔ سندھ اور بلوچستان میں دسمبر کے دوران غیر معمولی گرم موسم غالب رہا۔
محکمہ موسمیات کے مطابق کراچی سمیت کئی علاقوں میں دسمبر کے دوران بارش معمول سے کم ریکارڈ کیا گیا، درجہ حرارت میں اضافہ موسمیاتی تبدیلیوں کا نتیجہ ہے۔
دوسری جانب محکمہ موسمیات نے پنجاب اور خیبرپختونخوا میں موسم سرد اور خشک رہنے کی پیشگوئی کردی۔ محکمہ موسمیات کے مطابق اسلام آباداور گردونواح میں موسم سرد اورخشک رہنے کا امکان ہے،مری، گلیات میں مطلع جزوی ابرآلود رہنے کا امکان ہے،لاہور، سیالکوٹ، جہلم، گوجرانوالہ، گجرات، شیخوپورہ، فیصل آباد، جھنگ، ملتان، بہاولپور اور رحیم یار خان میں دھند متوقع ہے۔
خیبرپختو نخوا کےبیشتر اضلاع میں موسم سرد اور خشک جبکہ پہاڑی علاقوں میں شدید سردی کا امکان ہے پشاور، مردان، نوشہرہ، چارسدہ، صوابی، بنوں، ڈی آئی خان میں دھند کا امکان ہے۔
سندھ کے بیشتر اضلاع میں موسم سرد اورخشک رہنے کی توقع ہے،سکھر، روہڑی، شکارپور، کشمور،شہید بےنظیرآباد میں دھند پڑنے کا امکان ہے،جبکہ بلوچستان میں موسم سرد ،شمالی اضلاع میں شدید سرد رہنے کی توقع ہے۔
