پنجاب یونیورسٹی میں وزیراعظم لیپ ٹاپ اسکیم کے تحت طلبا میں لیپ ٹاپس کی تقسیم کی تقریب منعقد ہوئی، جس سے وفاقی وزیر قانون اعظم نذیر تارڑ نے خطاب کیا۔
وفاقی وزیر قانون نے کہا کہ وزیراعظم نے خصوصی ہدایت کی ہے کہ بچوں کو بتایا جائے کہ لیپ ٹاپ اسکیم ان کے دل کے بہت قریب ہے۔ وزیراعظم کی خواہش ہے کہ زیادہ سے زیادہ طلبا تک لیپ ٹاپس پہنچیں تاکہ وہ جدید تعلیم اور تحقیق سے ہم آہنگ ہو سکیں۔
اعظم نذیر تارڑ کا کہنا تھا کہ یہ چراغ پنجاب سے روشن ہوا اور اب پورے پاکستان میں پھیل چکا ہے۔ لیپ ٹاپ کامیابی کی کنجی کے طور پر آج طلبا کے ہاتھ میں ہے، جس سے وہ ریسرچ اور آئی ٹی اسکلز کو بہتر بنا سکتے ہیں۔
انہوں نے کہا کہ ہمارے زمانہ طالب علمی میں بڑے کمپیوٹرز ٹی وی پر دیکھتے تھے، ، جبکہ آج انفارمیشن ٹیکنالوجی کے انقلاب کے باوجود ہر کسی کو جدید گیجٹس تک رسائی حاصل نہیں۔ وسائل کی کمی کے باعث آج بھی کئی طلبا اس سہولت سے محروم ہیں۔
وفاقی وزیر قانون نے مزید کہا کہ طلبا کو جدید سہولیات فراہم کرنا حکومتوں کی ذمہ داری ہے ۔
