پاکستان میں تیل اور گیس کا ایک اور بڑا ذخیرہ دریافت ہوا ہے یہ ذخیرہ صوبہ خیبر پختونخوا کے ضلع ہنگو میں واقع ہے۔
پاکستان کی انرجی سیکیورٹی کے حوالے سے نئے سال کی اچھی ابتدا ہوگئی خیبر پختونخوا ،کوہاٹ میں تیل و گیس کے بڑے ذخیرے کے بعد گیس کا ایک اور ذخیرہ دریافت ہوگیا۔ ہنگو فارمیشن ٹل بلاک میں گیس کا ذخیرہ پی پی ایل اور او جی ڈی سی ایل نے مل کر دریافت کیا۔
سرکاری کمپنوں نے اہم پیشرفت سے حکومت، شیئر ہولڈرز کو خط بھیج کر آگاہ کردیا، کنواں سے یومیہ تقریبا 16 لاکھ اسٹینڈرڈ کیوبک فٹ گیس حاصل ہوگی، دریافت میں پاکستان آئل فیلڈ اور گورنمنٹ ہولڈنگز لمیٹڈ بھی حصہ دار ہیں۔
خیال رہے کہ گزشتہ روز بھی آئل اینڈ گیس ڈیولپمنٹ کمپنی لیمیٹڈ کے مطابق ضلع کوہاٹ میں تیل اورگیس کا نیا ذخیرہ دریافت ہوا اور یہ ذخیرہ نشپا بلاک میں واقع برگزئی ایکس او ون نامی کنوئیں سے دریافت ہوا ہے۔
او جی ڈی سی ایل نے بتایا کہ ابتدائی ٹیسٹ کے مطابق یومیہ 4100 بیرل خام تیل حاصل ہونے کی توقع ہے جبکہ تیل کیساتھ اس کنویں سے یومیہ 10.5 ملین اسٹینڈرڈ کیوبک فٹ گیس بھی حاصل ہوگی۔
او جی ڈی سی ایل نے مزید بتایا کہ تیل و گیس کی دریافت کیلئے زمین میں 5ہزار 170 میٹر کی کھدائی کی گئی، منصوبے میں او جی ڈی سی، پی پی ایل اور گورنمنٹ ہولڈنگز پرائیویٹ لمیٹڈ شراکت دار ہیں۔
