وزیراعظم شہبازشریف نے مظفرآباد میں جدید کینسر اسپتال اور میڈیکل کالج کا افتتاح کردیا۔
تقریب سے خطاب میں وزیراعظم شہبازشریف کا کہنا تھا کہ دکھی انسانیت کی خدمت سے بڑھ کر کچھ نہیں، کینسر اسپتال سے مقامی سطح پر بہترین طبی سہولتیں میسرآئیں گی۔ میں خود بھی کینسر جیسے موذی مرض کا شکار ہوا، اندازہ ہے کہ وسائل سے محروم افراد کیلئے کینسر کا علاج کتنا مشکل ہے۔
شہبازشریف نے کہا کہ شاندار ادارے کا افتتاح کرنا میرے لیے اعزاز ہے، جان لیوا بیماری میں مبتلا مریضوں کا علاج انسانیت کی بڑی خدمت ہے۔
وزیراعظم نے کشمیرانسٹیٹیوٹ آف نیوکلیئر میڈیسن،آنکالوجی اینڈ ریڈیو تھراپی کے مختلف حصوں کا دورہ بھی کیا، کشمیر انسٹیٹیوٹ آف نیوکلیئر میڈیسن،آنکالوجی اینڈ ریڈیو تھراپی پاکستان ایٹمی توانائی کمیشن کا منصوبہ ہے۔
چیئرمین پاکستان ایٹمی توانائی کمیشن راجا علی رضاانور نے تقریب سے خطاب میں کہا کہ جدید کینسر اسپتال عوامی خدمت کے غیرمتزلزل عزم کےتحت قائم کیا گیا، پنجاب میں 6،خیبرپختونخوا5،سندھ میں 5 اسپتال قائم کیے گئے، اسلام آباد، بلوچستان، گلگت بلتستان اور آزاد کشمیر میں ایک ایک اسپتال قائم کیا گیا، جدید اسپتالوں میں سالانہ 10لاکھ سےزائد کینسر کےمریضوں کا علاج کیا جاتا ہے۔
بین الاقوامی ایٹمی توانائی ایجنسی کے ڈائریکٹر جنرل رافیل ماریانوگروسی نے ویڈیو پیغام میں کہا کہ آزاد کشمیر میں کینسر اسپتال کا قیام اہم سنگ میل ہے، عوامی فلاح کیلئے ایٹمی توانائی کا استعمال لائق تحسین ہے۔
