بھارتی میڈیا نے دعویٰ کیا ہے کہ بالی وڈ کے معروف اداکار رنویر سنگھ نے مشہور فلمی سیریز کی اگلی فلم ’ڈان 3‘ میں کام کرنے سے انکار کر دیا ہے۔
یاد رہے کہ سال 2023 میں اداکار، ہدایتکار اور پروڈیوسر فرحان اختر نے فلم ڈان 3 کا اعلان کرتے ہوئے بتایا تھا کہ اس بار بالی وڈ کے کنگ شاہ رخ خان کے بجائے رنویر سنگھ مرکزی کردار ’ڈان‘ میں نظر آئیں گے۔
اس حوالے سے فرحان اختر نے سوشل میڈیا پلیٹ فارم ایکس پر بھی پوسٹ شیئر کی تھی اور فلم کی شوٹنگ جلد شروع ہونے کا عندیہ دیا تھا۔تاہم فلم کے اعلان کے دو سال بعد اب رنویر سنگھ کی جانب سے ڈان 3 چھوڑنے کی خبریں سامنے آ رہی ہیں۔
بھارتی میڈیا رپورٹس کے مطابق قریبی ذرائع نے بتایا ہے کہ فلم ’دھریندر‘ کی شاندار کامیابی کے بعد رنویر سنگھ سنجے لیلا بھنسالی اور لوکیش کنگراج جیسے بڑے فلم سازوں کے ساتھ کام کرنے کے خواہشمند ہیں اور وہ مسلسل گینگسٹر کرداروں میں نظر نہیں آنا چاہتے۔
بھارتی میڈیا کا کہنا ہے کہ رنویر سنگھ نے ڈان 3 کے مقابلے میں اپنے دیگر فلمی منصوبوں کو ترجیح دینے کا فیصلہ کیا ہے۔ رپورٹس کے مطابق ’دھریندر‘ کی ریلیز کے فوراً بعد ڈان 3 کی شوٹنگ شروع ہونا تھی، تاہم موجودہ صورتحال کے باعث فلم کو فی الحال مؤخر کر دیا گیا ہے۔
واضح رہے کہ رنویر سنگھ یا فلم کے پروڈیوسرز کی جانب سے اس حوالے سے تاحال کوئی باضابطہ بیان سامنے نہیں آیا۔
