عالمی شہرت یافتہ پاکستانی گلوکار و اداکار علی ظفر نے اپنی چوتھی اسٹوڈیو البم ’روشنی‘ریلیز کر دی، 15 برس بعد ریلیز ہونے والی البم میں 12 گانے شامل ہیں۔یہ البم ان کے موسیقی کے سفر میں ایک نئے باب کا اضافہ ہے، کیونکہ علی ظفر کی 15برس بعد اس فارمیٹ میں واپسی ہوئی ہے۔
البم کی ریلیز کے ساتھ ہی مداح پہلی بار ’روشنی‘ کو مکمل طور پر سن رہے ہیں، اس کے ساتھ البم آرٹ ورک، مکمل ٹریک لسٹ اور علی ظفر کا آرٹسٹ نوٹ بھی سامنے آیا ہے، جو اس البم کے پیچھے موجود جذباتی اور تخلیقی دنیا کی جھلک پیش کرتا ہے۔
بارہ گانوں پر مشتمل یہ البم مختلف موسیقی کے اندازوں کا حسین امتزاج ہے، جس میں روح پرور بیلڈز، افرو اثرات سے بھرپور ردھمز، اماپیانو گرووز، اکوسٹک پاپ اور ڈیپ ہاؤس ٹیکسچرز شامل ہیں۔
البم میں السٹیر الون، طلحہ انجم، ڈی جے شاہ رخ اور علی حیدر کے ساتھ اشتراک بھی شامل ہے، جو مختلف دنیائے موسیقی کی آوازوں کو ایک مربوط اور منفرد ساؤنڈ میں سموئے ہوئےہے۔
ٹریک لسٹ:
* رُکسانا
* 5 اسٹار
* ماماسیٹا (السٹیر الون کے ساتھ)
* سانولی سلونی (السٹیر الون کے ساتھ)
* روشنی
* شدت
* بے قراری سی
* ڈھونڈتا ہوں
* تیرے بن میں
* چل دل میرے (طلحہ انجم کے ساتھ)
* میرا پیار (ڈی جے شاہ رخ کے ساتھ)
* ظالم نظروں سے (علی حیدر کے ساتھ)
اپنے آرٹسٹ نوٹ میں علی ظفر نے 'روشنی‘ کو روشنی اور سائے، خود احتسابی اور جذباتی تضاد کا سفر قرار دیا ہے۔ یہ البم انسان کے اندر سچ کا سامنا کرنے اور پیچیدگی کے اندر وضاحت تلاش کرنے کی عکاسی کرتی ہے، جہاں کمزوری اور امید ایک ساتھ موجود رہتی ہیں۔
البم کے ساتھ ہی گانے ’رُکسانا‘ کی میوزک ویڈیو بھی جاری کی گئی ہے۔ لاس اینجلس میں فلمائی گئی یہ ویڈیو گانے کی دلکش دھن کے ساتھ صاف، سنیماٹک مناظر پیش کرتی ہے، جہاں موسیقی اور موڈ کو مرکزی حیثیت حاصل ہے۔
اس البم کا آغاز اس سے قبل ’ظالم نظروں سے‘ کی ریلیز کے ساتھ ہوا تھا، جس نے ڈیجیٹل پلیٹ فارمز پر تیزی سے مقبولیت حاصل کی۔ مکمل البم کی ریلیز کے ساتھ ’روشنی‘ فنی ارتقا، ذاتی سچائی اور عالمی امنگوں کا مضبوط اظہار بن کر سامنے آئی ہے۔
