صدر مملکت آصف علی زرداری کا کہنا ہے کہ بھارت کا رویہ مؤثر علاقائی تعاون میں بڑی رکاوٹ ہے۔ باہمی احترام اور تعاون سے خطہ زیادہ پرامن اور خوشحال ہوسکتا ہے۔
سارک چارٹرڈے کی 40 ویں سالگرہ پر اپنے پیغام میں صدر مملکت نے جنوبی ایشیائی ممالک کے عوام و حکومتوں کو مبارکباد پیش کی ہے، کہا اسلام آباد نے چوتھے اور 12ویں سارک سربراہ اجلاس کی میزبانی کی، 2016 میں 19واں اجلاس بھارت کی عدم شرکت کے باعث ملتوی ہوا۔
آصف علی زرداری نے کہا کہ گزشتہ 11 برس سے سارک کا عمل جمود کا شکار ہے، بھارت کا رویہ مؤثر علاقائی تعاون میں بڑی رکاوٹ ہے، خطے کی ترقی اور امن غیر ضروری طور پر تعطل کا شکار ہے، سارک کے متبادل نئے علاقائی فریم ورک پر غور بڑھ رہا ہے۔
صدر مملکت نے کہا کہ ایران اور چین کی شمولیت سے علاقائی رابطہ کاری میں اضافہ ہوگا، پاکستان جامع تعاون پر مبنی علاقائی نظام کے لیے پُرعزم ہے، تجارت، ٹرانزٹ اور توانائی میں روابط کے فروغ کے لیے تیار ہیں، خطے کے مسائل مشترکہ ہیں اس لئے حل بھی مشترکہ ہونے چاہئیں، باہمی احترام اور تعاون سے خطہ زیادہ پرامن اور خوشحال ہوسکتا ہے۔
