فیلڈ مارشل سید عاصم منیر نے وانا کیڈٹ کالج پر حملہ آور خوارج کے خلاف آپریشن پر لمحہ بہ لمحہ نظر رکھی ۔ سپہ سالار نے واضح ہدایت کی کہ قوم کے معمار ہمارا سرمایہ ہیں ان پر ہرگز کوئی آنچ نہ آنے پائے ۔ سیکیورٹی فورسز نے فیلڈ مارشل کے احکامات پر حرف بہ حرف عمل کیا۔ کیڈٹس کے مطابق پاک فوج کے جوان کیڈٹس اور خوارج کے درمیان ڈھال بن کر کھڑے رہے اور جانیں دے کر بچوں کو بچایا۔
افغان خوارج کا کیڈٹ کالج وانا پر حملہ ناکام بنانے والے آپریشن کمانڈر کرنل محمد طاہر کا کہنا تھا 10 نومبر کو 5 افغان خوارج نےکیڈٹ کالج وانا پر حملہ کر دیا۔ دہشت گردوں نے وانا کیڈٹ کالج کو نشانہ بنانے کی کوشش کی جو پاک فوج کا جنوبی وزیرستان کےعوام کیلئے قیمتی تحفہ ہے ۔ ایک خود کش حملہ آور نے دھماکا کیا جبکہ دیگر خوارج نے گیٹ میں داخل ہونے اور زیر تعلیم بچوں کو یرغمال بنانے کی کوشش کی۔
کرنل محمد طاہر نے کہا کہ سیکیورٹی فورسز کی بروقت کارروائی نے خوارج کے حملے اور مذموم عزائم کو ناکام بنا دیا ۔ ہم نے دہشت گردوں کو مخصوص بلاک میں محدود کر کے طالب علموں کی حفاظت کو یقینی بنایا ۔ رات 10 سے ساڑھے 10 بجے کے درمیان بھرپور آپریشن کر کے تمام خوارج کو جہنم واصل کر دیا گیا ۔
زیر تعلیم کیڈٹس نے بتایا ہم عصر کے وقت ڈرل کمپٹیشن کی تیاری کر رہے تھے کہ خودکش دھماکا ہوا ۔ ہمیں معلوم ہو گیا کہ حملہ تعلیم کےدشمنوں نے کیا ہے ۔ اساتذہ نے کہا کہ آپ پر سکون ہو جائیں اب پاک فوج آگئی ہے ۔ پاک فوج کے جوانوں نے ہمیں بحفاظت کالج سےمحفوظ مقام پر منتقل کیا ۔ الحمد للہ ! بروقت کارروائی سے خوفناک دہشت گردی کا منصوبہ خاک میں مل گیا ۔ تعلیم کے دشمن کچھ بھی کر لیں وہ ہمیں تعلیم سے نہیں روک سکتے ۔
