وزیر اعلیٰ خیبر پختونخوا محمد سہیل آفریدی نے صوبے کے سرکاری اسکولوں میں چھٹی جماعت سے آرٹیفیشل انٹیلیجنس کے کورسز متعارف کرانے اور اس سلسلے میں ضروری اقدامات اٹھانے اور مطلوبہ وسائل ہنگامی بنیادوں پر فراہم کرنے کی ہدایت کردی ہے۔
وزیراعلیٰ خیبرپختونخوا محمد سہیل آفریدی کی زیر صدارت محکمہ ابتدائی و ثانوی تعلیم کا اجلاس ہوا۔ جس میں صوبائی وزیر ثانوی تعلیم ارشد ایوب اور دیگر اعلی حکام نے شرکت کی ۔ وزیراعلیٰ نے کہا کہ مستقبل کی معیشت، تعلیم، صحت اور انتظامی نظام میں مصنوعی ذہانت کا کردار مرکزی حیثیت اختیار کر چکا ہے۔ نوجوانوں کو اے آئی کی تعلیم دینا دراصل انہیں مستقبل کے چیلنجز کا مقابلہ کرنے کے قابل بنانا ہے۔
سہیل آفریدی نے ضم اضلاع کے اسکولوں میں اساتذہ کی کمی پوری کرنے کے لیے نئی آسامیاں تخلیق کرنے کی ہدایت کی، انہوں نے کہا کہ سرکاری امور کی انجام دہی میں غفلت برتنے والے ملازمین کو عہدوں سے فارغ کیا جائے ۔
وزیر اعلیٰ کی ٹیکسٹ بکس کی پرنٹنگ اور اسٹیشنری کی خریداری کے لیے ٹینڈرز سے متعلق انکوائری کرانے اور نصابی کتب کی چھپائی سرکاری پریس سے کرانے کی ہدایت کی ۔ وزیر اعلیٰ کی اساتذہ کی پوسٹنگ ٹرانسفر ، لیو انکیشمنٹ، پروموشن سمیت تمام اور اسکولوں میں فراہم کی جانی والی اسکالرشپس کو بھی ڈیجیٹل سسٹم پر منتقل کرنے کی ہدایت کی۔
