وزیراعظم شہبازشریف کا کہنا ہے کہ اللہ کے فضل و کرم سے ملک میں سیاسی و معاشی استحکام کی بدولت ملک کی سمت درست ہوئی۔ ملکی معاشی صورتحال میں بتدریج بہتری ہو رہی ہے، ملک کی ترقی و خوشحالی کیلئے سب کو مل کر کام کرنا ہے۔
حکومتی اور اتحادی جماعتوں کے سینیٹرز کے اعزاز میں عشائیہ سے خطاب میں وزیراعظم شہبازشریف نے سینیٹرز کا خیرمقدم کیا اور 27ویں آئینی ترمیم کی منظوری کیلئے تعاون پر شکریہ ادا کیا۔
شہبازشریف نے کہا کہ صدرمملکت آصف علی زرداری اور تمام اتحادی جماعتوں کے سربراہوں کا مشکور ہوں، تمام اتحادی جماعتوں نےاس قومی سوچ کا بھرپور ساتھ دیا، وفاق کی مضبوطی صوبوں میں ہم آہنگی بڑھانے اور گورننس بہترکرنے کےلئے سب نے ملکر کوشش کی۔
وزیراعظم کا کہنا تھا کہ موجودہ حکومت نے حاصل تمام سنگ میل اتحادی جماعتوں کے باہمی تعاون سے حاصل کیے، پاکستان کی سفارتی کامیابیاں اتحادی جماعتوں کے درمیان ہم آہنگی اوراتحادکی عکاس ہے، ہم سب کی مشترکہ کوششوں کی بدولت پاکستان کو شاندار مقام حاصل ہوا ہے۔
