ڈی جی آئی ایس پی آر لیفٹیننٹ جنرل احمد شریف چوہدری کا کہنا ہے کہ پاک فوج دفاع وطن کے لیے پرعزم ہے اور کسی بھی بیرونی جارحیت کا جواب سخت اور بھرپور دیا جائے گا۔
ڈی جی آئی ایس پی آر لیفٹیننٹ جنرل احمد شریف چوہدری نے ایبٹ آباد میں اساتذہ اور طلبا سے خصوصی نشست میں ملکی سلامتی، پاک افغان صورتحال اور فتنہ الخوارج کے خلاف اقدامات پر تفصیلی گفتگو کی۔ بڑی تعداد میں اساتذہ اور طلبا نے شرکت کی۔ نشست کے دوران ملکی سلامتی، پاک افغان کشیدگی، معرکہ حق اور دہشت گردی کے خلاف قومی عزم پر تبادلہ خیال کیا گیا۔
لیفٹیننٹ جنرل احمد شریف چوہدری نے واضح کیا کہ پاکستان نے دہشتگردی اور فتنہ الخوارج کے خلاف مؤثر اقدامات کیے ہیں۔ پاک فوج دفاع وطن کے لیے پرعزم ہے اور کسی بھی بیرونی جارحیت کا جواب سخت اور بھرپور دیا جائے گا۔ اساتذہ اور طلبا نے شہداء اور غازیان کو خراج تحسین پیش کیا۔ وائس چانسلر ہزارہ یونیورسٹی ڈاکٹر اکرام اللہ خان نے کہا کہ پاک فوج وطن سے محبت کا حقیقی استعارہ ہے اور ہم ہمیشہ اس کے شانہ بشانہ کھڑے ہیں۔
اساتذہ نے کہا کہ دشمن عناصر نوجوانوں کے ذہنوں کو گمراہ کرنے کی کوششیں کر رہے ہیں، اس لیے مصدقہ معلومات کی فراہمی ناگزیر ہے۔ طلبا نے اظہار کیا کہ انہیں ڈی جی آئی ایس پی آر سے ملاقات کے دوران پاک فوج کے کردار اور ملکی حالات سے متعلق درست معلومات حاصل ہوئیں، جس سے کئی ابہامات دور ہو گئے۔
