کور کمانڈر بلوچستان لیفٹینٹ جنرل آصف غفور نے وزیراعلیٰ اور ان کی ٹیم کو چیف آف آرمی سٹاف کی ہدایات پر گزشتہ ایک سال سے جاری حکمت عملی سے آگاہ کیا۔
حکام کے مطابق نگران وزیراعلیٰ بلوچستان میرعلی مردان خان ڈومکی نےکابینہ کے سینئر ارکان اور سول انتظامیہ کے افسران ہمراہ ہیڈکوارٹر بلوچستان کورکمانڈر کا دورہ کیا ۔
نگران وزیراعلیٰ نے آمد پر یادگار شہداء پر پھولوں کی چادر چڑھائی اور فاتحہ خوانی کی۔ بعد ازاں وزیر اعلیٰ اور ان کی ٹیم کو صوبہ کی سیکورٹی صورتحال اور سیکورٹی فورسز کے آپریشنز کے بارے میں تفصیلی بریفنگ دی گئی۔
کورکمانڈر بلوچستان لیفٹننٹ جنرل آصف غفور نے فورم کو چیف آف آرمی سٹاف کی ہدایات پر گزشتہ ایک سال سے جاری حکمت عملی سے آگاہ کیا جس میں بلوچستان کی سماجی و اقتصادی ترقی بنیادی پہلو ہے اور سیکیورٹی فورسز اس کے لیے محفوظ اور سازگار ماحول فراہم کرنے کے لیے عمل پیرا ہیں۔
وزیراعلیٰ نے صوبہ میں امن اور ترقی کے لیے سیکیورٹی فورسز کی کارکردگی کو سراہا اور شہداء کی قربانی کو مادر وطن کی بقا کے لیے عظیم قربانی قرار دیا۔
انہوں نے کہا کہ ہم سب مل کر صوبے کے امن اور ترقی کے لیے کام کریں گے جو ملکی امن اور ترقی میں مددگار ہو گا۔
