وزیر دفاع خواجہ آصف نے کہاہے کہ پاکستان اور افغانستان کے درمیان بات چیت شروع ہوئی ہے، امید ہے اس بات چیت کا شام تک کوئی آؤٹ کم آئے گا، مذاکرات طے نہیں پاتے توآپشن ہے ہماری،تمہاری کھلی جنگ ہے۔
وزیردفاع کا کہنا تھا کہ شہدا کی وجہ سے ہماری سرحدیں محفوظ ہیں، ہماری بہادر افواج ملک کی حفاظت کیلئے ہر لمحہ تیار ہیں، ہم ہر دوسرے دن شہدا کے جنازے اٹھاتے ہیں، ہم چین سے سوتے ہیں ،ہماری سرحدیں محفوظ ہاتھوں میں ہیں، سیکیورٹی فورسز کے جوان سرحدوں پر اپنی جانیں قربان کر رہے ہیں، ہماری پولیس اور افواج دہشتگردوں کے خلاف لڑ رہی ہیں، بھارت کے خلاف ایک جنگ لڑ چکے ہیں،اب بھارت جنگ افغانیوں کے ذریعے لڑ رہا ہے۔
سیالکوٹ میں گورنمنٹ سردار بیگم ٹیچنگ اسپتال کی تعمیرنو کی تکمیل پر افتتاحی تقریب کے موقع پر وزیر دفاع خواجہ آصف نے میڈیا سے گفتگو کرتے ہوئے مزید کہا کہ ہماری افواج اس وقت دہشت گردی کے خلاف برسر پیکار ہے، اگر وہ ڈاکٹروں کا رویہ اپنا لیں تو کون حفاظت کرے گا،اسپتال میں ڈاکٹر نہیں ہوتے وہ نجی پریکٹس کرنے کوترجیح دیتے ہیں، لیکن شہدا کے لئے یہ چوائس میسر نہیں ہوتی۔
انہوں نے واضح کرتے ہوئے کہا کہ افغانستان کے ساتھ 2 گھنٹے قبل میٹنگ ہوئی ہے، اس کے نتائج کل تک سامنے آجائیں گے ، اگر معاملات طے نہ ہوئے تو جنگ ہی ہو گی، قطر میں مذاکرات کا پہلا دور ہوا تھا ابھی بات چیت کا عمل جاری ہے، اگر 40، 50لاکھ افغانی یہاں مقیم ہیں تو نوکریوں اور کاروبار پر بھی قابض ہیں۔
