کینیڈا میں سرگرم بھارتی نژاد گینگ ’ روہت گودارا ‘نے معروف پنجابی گلوکار ’تیجی کاہلوں ‘کو فائرنگ کر کے زخمی کر دیا ہے، گینگ نے گلوکار پر قاتلانہ حملے کی باقاعدہ طور پر ذمہ داری بھی قبول کی ہے۔
بھارتی میڈیا کے مطابق گینگ کے تین ارکان وکی پہلوان، مہندر سرن اور راہول رناؤ نے سوشل میڈیا پر ایک ویڈیو جاری کرکے کھلم کھلا اعتراف کیا ہے کہ انہوں نے ہی تیجی کاہلوں پر قاتلانہ حملہ کیا۔
ویڈیو میں گینگ کے ارکان نے دھمکی آمیز لہجے میں کہا کہ "اگر اس نے سمجھ لیا ہے تو ٹھیک، ورنہ اگلی بار ہم اس کو بھی ختم کر دیں گے" جس سے ظاہر ہوتا ہے کہ مزید افراد بھی ان کے نشانے پر ہو سکتے ہیں۔
گینگ نے اپنے بیان میں مخالف گینگسٹرز کی مدد کرنے والے تاجروں، بلڈرز اور دیگر افراد کو بھی کھلی دھمکیاں دیتے ہوئے کہا ہے کہ ایسے لوگوں اور ان کے خاندانوں کو کسی رعایت کی توقع نہیں رکھنی چاہیے۔
بھارتی میڈیا کے مطابق روہت گینگ نے تیجی کاہلوں پر الزام لگایا تھا کہ وہ مخالف گروہوں کو مالی معاونت، اسلحہ اور خفیہ معلومات فراہم کر رہے تھے۔
