وفاقی وزیر اطلاعات عطاء اللہ تارڑ سے امریکی ناظم الامور نٹیلی بیکر کی ملاقات ہوئی،ملاقات میں دوطرفہ تعلقات،ڈیجیٹل میڈیا شراکت داری اور سیاحت کے فروغ سمیت اہم امور پر تبادلہ خیال کیا گیا۔
وفاقی وزیر اطلاعات عطاء اللہ تارڑ اور امریکی ناظم الامور نٹیلی بیکرکی ملاقات میں دوطرفہ تعلقات، ڈیجیٹل میڈیا تعاون،سیاحت کےفروغ اورانسداد دہشت گردی کے اقدامات پرتفصیلی بات چیت ہوئی۔امریکی ناظم الامور نے پاکستان کی معیشت کے استحکام اور ترقی کی سمت پیشرفت کو سراہا،جبکہ دہشت گردی کےخلاف پاکستان کے صف اول کے کردار کی تعریف کی۔
عطاء اللہ تارڑ نےکہاکہ دہشت گردی کےخلاف پاکستان کی قربانیاں عالمی امن کے لیےہیں،فیک نیوز کے خاتمے اورڈیجیٹلائزیشن کے فروغ کے لیےحکومت نے جامع پالیسی متعارف کرائی ہے،جسے مزید اجاگر کرنے کی ضرورت ہے۔
وفاقی وزیر اطلاعات نے کہا کہ پاکستان قدرتی حسن، ثقافتی تنوع اور تاریخی ورثے سے مالا مال ملک ہے۔ سیاحت کے فروغ سے معاشی سرگرمیوں میں اضافہ اور عوامی روابط مضبوط ہوں گے۔حکومت سیاحت کے فروغ اور صحافیوں کی فلاح و بہبود کے لیے بھی قانون سازی کر رہی ہے۔امریکی ناظم الامور نٹیلی بیکر نےصحافیوں کے تحفظ کے لیے پاکستان کی کوششوں کو سراہا۔
